ކުރި ސަރުކާރުން ދޫކޮށްފައި ހުރި ގޯތިތައް ދިނުން އަވަސްކުރުމަށް ގޮވާލާ އެ ގޯތިތަކުގެ ހައްގުވެރިން އަނެއްކާވެސް މުޒާހަރާކޮށްފިއެވެ.
ރަސްފަންނު ސަރަހައްދުގައި ކުރިޔަށްދިޔަ ސުލްހަވެރި އިހުތިޖާޖުގައި ބައިވެރިން ވަނީ ބޯހިޔާވަހިކަމަށް ހައްލު ގެނެސްދިނުމަށް ގޮވާލާފައެވެ. އަދި ފްލެޓްތަކުގެ މައްސަލަ ދިގުލައިގެން ދިއުމާއި، ގުޅީފަޅު މަޝްރޫޢުގެ އިތުރުން ހުޅުމާލެ ފޭސް 3 ގެ މަޝްރޫޢުތައް ހުއްޓާލުމަކީ ރައީސް މުޢިއްޒުގެ ސިޔާސީ އެޖެންޑާތަކާ ގުޅިފައިވާ ކަންކަން ކަމަށް ރައްޔިތުން ތުހުމަތުކޮށްފައިވެއެވެ.
ގޯއްޗާއި ފުލެޓު ލިބުނު އެއްވެސް މީހަކު ބާކީ ނުކޮށް، އެ އެންމެންނަށް ވެސް ގޯއްޗާއި ފްލެޓު ހަވާލުކުރާނެ ކަމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ރިޔާސީ ވައުދާ އެއްގޮތަށް އެކަން ކުރެއްވުމަށެވެ. އަދި ގޯތި ދިނުމަށް ހިއްކަން ފަށާފައިވާ ސަރަހައްދުތައް އަވަހަށް ހިއްކާ ނިންމުމަށް ވެސް އެމީހުން ވަނީ ގޮވާލާފައެވެ.
ހަމައެހެންމެ ހައްގުތައް ކަށަވަރުކުރަން ރައްޔިތުން ދެން އިހުތިޖާޖުކޮށް މަގުމަތީ އަޑުގަދަ ކުރަން ނުޖެހޭނެކަމަށް ވިދާޅުވި ނަމަވެސް އަދިވެސް އެކަން އޮތީ އެހެންކަމަށް ވެސް އިހުތިޖާޛުގެ ބައިވެރިން ބުނެފައިވެއެވެ.
ގޯތިތަކުގެ ހައްގުވެރިން އިހުތިޖާޖަށް ނުކުމެފައިވަނީ، ބިންވެރިޔާ" ސްކީމުގެ ދަށުން އެމްޑީޕީ ސަރުކާރުން ދީފައި ހުރި ގޯތިތައް އަތުލުމަށް މި ސަރުކާރުގައި، މަޖިލިސް މެންބަރުން ކުރާ މަސައްކަތް ހުއްޓުވުމަށް މުޒާހަރާއަށް ނުކުތުމަށް ގުޅީފަޅު ސިޓިޒެންސް އެސޯސިއޭޝަންއިން ގޮވާލާފައިވަނިކޮށެވެ.
މީގެ އިތުރުން ގޯތިތައް ހަވާލުކުރުން އަވަސްކުރުމަށް ގޮވާލަން ރައްޔިތުންނާއެކު މަޖިލިސް މެމްބަރުން ނުކުތުމަށް ގިރާވަރުފަޅު ސިޓިޒެންސް އެސޯސިއޭޝަނުން ގޮވާލައިފައިވެއެވެ.
މި ސަރުކާރުގައި ގޯތި އަތުނުލާނެ ކަމަށް ރައީސް މުހައްމަދު މުއިއްޒު ވިދާޅުވި ނަމަވެސް ގޯތިތައް ނުދީ ދަނީ ހިފަަހައްޓާ ލަސްކުރަމުންކަން ފާހަގަކޮށްލެވެއެވެ. މިކަމާ ގުޅިގެން ގޯތި ލިބުނު ފަރާތްތަކުން ދަނީ އެތައް ކަންބޮޑުވުމެއް ފާޅުކުރަމުންނެވެ.
