ފްލެޓް ލިބޭނެ ކަމުގެ ޔަގީންކަން ދީ ސަރުކާރަކުން ލިޔުންދީފައިވާ ބަޔަކާމެދު ބޭނުންހާ ގޮތަކަށް އަމަލު ނުކުރެވޭނެ ކަމަށާ ސަރުކާރުން ބޭނުން ނުވުމުން ފްލެޓް ލިސްޓު ބާތިލު ކުރުމަކީ ކުރެވޭނެ ކަމެއް ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ޕީއެންއެފް އޮފީހުގައި ރޭ ބޭއްވި ޖަލްސާގައި ވާހަކަދައްކަވަމުންނެވެ.

މި ސަރުކާރުގެ ވިސްނުން ހުރީ ކުރި ސަރުކާރުން ދީފައިވާ ފްލެޓް ލިސްޓަށް ބޮޑު ބަދަލެއް ގެނައުމަށް ކަމަށް ގިނަ ބަޔަކު ތުހުމަތު ކުރަމުންދާ ދިއުމަށާ އަދި އެކަމާ މެދު ފްލެޓް ލިބުނު މީހުންގެ ބޮޑު ކަންބޮޑުވުން އެކަމުގައި އޮތް އޮތުމަށް އިޝާރާތްކުރައްވާ ރައީސް ޔާމީން ވިދާޅުވީ ފްލެޓް ލިބުނު މީހުންނާއެކު ސަރުކާރުން އެއްބަސްވުމެއް ހަދާފައިވާ ކަމަށާ އެކަން އެހެން އޮއްވާ ދެން އަންނަ ސަރުކާރަކަށް އެކަން ބަދަލު ނުކުރެވޭނެ ކަމަށެވެ. އަދި މައްސަލަ ބެލުމަށް ފަހު ލިސްޓް ބާތިލުކުރަން އެންޓި ކޮރަޕްޝަން ކޮމިޝަން (އޭސީސީ)އިން ބުނާނަމަ އެކަމުގެ ފުރިހަމަ ހަގީގަތް ބުނެދޭން ޖެހޭނެ ކަމަށް ވެސް ރައީސް ޔާމީން ވަނީ ވިދާޅުވެފައެވެ.

އެގޮތުން ރައީސް ޔާމީން ވިދާޅުވީ އެ އެގްރިމަންޓަކީ ހަަމއެކަނި ކަރުދާސް ގަނޑެއް ނޫންކަމަށާ އެއީ ސަރުކާރަކާ ރައްޔިތަކާ ދެމެދު ވެފައިވާ އެއްބަސްވުމެއް ކަަމަށެވެ.

ރައީސް ޔާމީން އިތުރަށް ވިދާޅުވީ މިހާރު އަމަލު ކުރަމުންދާ ގޮތުން މިނިސްޓަރު ހައިދަރުގެ މައްސަލަ ބަލަން ޖެހޭ ކަމަށެވެ. އަދި ފްލެޓް ލިސްޓް ހިފަހައްޓާ، ބަދަލު ކުރުމަކީ ކުރެވިގެން ވާނެ ކަމެއް ނޫން ކަމަށް ވިދާޅުވި އެވެ.

ހައުސިން މިނިސްޓްރީން ކުރީން ބުނެފައިވަނީ މިދިޔަ އޮކްޓޯބަރު މަސް ނިމުމުގެ ކުރިން ފުލެޓު ހައްގުވެރިންގެ ލިސްޓު އެކުލަވައިލާ އާންމުކުރާނެ ކަމަށެވެ. އެކަން ތަކުރާރުކޮށް އިއުލާނު ވެސް ކުރިއެވެ. ނަމަވެސް ފުލެޓު ލިބޭ މީހުންގެ ލިސްޓު ބެލުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ލަފާފުޅުގެ މަތިން އެކުލަވައިލި ކޮމިޓީން އެވިލުއޭޓުކޮށް އެކުލަވައިލި ލިސްޓު ކަމުނުދާ ކަމަށް ބުނެ އެންމެ ފަހު ވަގުތު ނިންމީ ލިސްޓް އާންމު ކުރުން ފަސްކުރާށެވެ.

ރައީސް އިބްރާހިމު މުހައްމަދު ސޯލިހްގެ ސަރުކާރުން ފެށި ގެދޮރުވެރިޔާ ސްކީމުގެ ދަށުން 15،000 އަށްވުރެ ގިނަ ފަރާތުންވަނީ ފުލެޓު ހޯދުމަށް ހުށަހަޅާފަ އެވެ. އެއިން 9،000 މީހުން ފުލެޓަށް ޝަރުތު ފުރިހަމަވާކަމަށް އެމްޑީޕީ ސަރުކާރުގައި ނިންމި އެވެ. އަދި ފަހި ދިރިއުޅުން ކޯޕަރޭޝަނުން އަޅަމުންދާ 4،000 ފުލެޓުގެ ހައްގުވެރިންގެ ލިސްޓެއްވެސް އެއިރު އާންމުކުރިއެވެ.  

ނަމަވެސް އެ 4،000 ފުލެޓުގެ ހައްގުވެރިން ކަނޑައަޅައި އާންމުކުރި ލިސްޓުގައި ގިނަ މައްސަލަތަކެއް ހުރިކަން އޭސީސީން ފާހަގަކުރުމާއެކު، އެ ފަރާތްތަކަށް ފުލެޓު ދޫކުރުން މެދުކެނޑިގެން ދިޔަ އެވެ. އެއަށްފަހު މި ސަރުކާރުން އެ ލިސްޓު އެވެލުއޭޓުކުރުމުގެ މަސައްކަތް ފެށިއެވެ. އެ މަސައްކަތް ކުރާތާ މަސްތަކެއް ވެއްޖެއެވެ.