ޕީޕަލްސް ނެޝަނަލް ފްރޮންޓް (ޕީއެންއެފް)ގެ ޖަލްސާތަކުގައި އިންނަވާ އެމަނިކުފާނު ފާޑުވިދާޅުވަނީ ރައީސް މުހައްމަދު މުއިއްޒަކަށް ނޫން ކަމަށާއި ފާޑުވިދާޅުވަނީ ގައުމުގެ ކަންތައް ހިނގަމުންދާ ގޮތާ ގުޅޭ ގޮތުން ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީޕަލްސް ނެޝަނަލް ފްރޮންޓް (ފީއެންއެފް) ގެ ނަމުގައި ޕާޓީއެއް އުފައްދަވައިގެން މިހާރު ސިޔާސީ މަސައްކަތް ކުރައްވަމުން ގެންދަވާ ރައީސް ޔާމީން ރާއްޖެ ޓީވީގެ "ފަށާއިރު" ޕްރޮގްރާމްގައި މިއަދު ވިދާޅުވީ ޕީޕީއެމްއިން އެންމެ ވަރުގަދަ އިދިކޮޅު މައި ޕާޓީގެ ގޮތުގައި އޮވެ މިދިޔަ ރިޔާސީ އިންތިހާބު ބޮއިކޮޓް ކުރިނަމަ ދުނިޔޭގެ ސަމާލު ކަމަށް އެކަން އައިސް، ކޯޓުގެ ތެރެއިން ކޮންމެ ވެސް ހައްލެއް ލިބިގެންދާނެ ކަމަށް ބެލެވުނު ކަމަށެވެ.

ނަމަވެސް ޕާޓީގެ އެތެރެއިން ނިންމި ގޯސް ނިންމުންތަކެއްގެ އާޚިރު ނަތީޖާ އަކީ ހެޔޮ ވެރިކަން ގެއްލި، ގައުމު މި ހާލަތު ވެއްޓި، ރާއްޖެ ހަލާކުވެގެން ދިއުން ކަމަށް ރައީސް ޔާމީން ވިދާޅުވިއެވެ. އަދި ވިދާޅުވީ މިކަމުގެ ހަގީގީ ޒިންމާ ނަގަންޖެހޭނީ އެމްޑީޕީ ސަރުކާރުން ކަމަށެވެ.

ރައީސް ޔާމީން ދެން ވިދާޅުވީ ވެރިކަމާ ހަވާލުވެ ވަޑައިގެން މުއިއްޒު އަމަލު ކުރައްވާ ގޮތް ކަމު ނުދާ ކަމަށެވެ. އަދި ދޭސީކޮށް، ޣައިރު ޒިންމާދާރުކޮށް އަމަލުތައް ކުރާނެ ކަމާމެދު އުންމީދު ނުކުރައްވާ ކަމަށްވެސް ވިދާޅުވި އެވެ.

ރައީސް މުއިއްޒު އިތުރުފުޅު ހައްދަވާކަން ފާހަގަކުރައްވައި ރައީސް ޔާމީން ވިދާޅުވީ ރާއްޖޭގައި އިންޑިއާ ސިފައިން ގާއިމްވެ އެބަ ތިބި ކަމަށާއި، މިލިޓަރީ ޔުނީފޯމް އެއްވެސް ބަޔަކު ނުތިބޭނެ ކަމަށް މިސަރުކާރުން ބުނާބުނުމަކީ މިލިޓަރީ ނެތުން ނޫން ކަމަށެވެ.

ރައީސް ޔާމީން އިތުރަށް ވިދާޅުވީ ރައްޔިތުން ތަހައްމަލު ކުރަމުންދަނީ ވަރަށް ހިތްދަތި، ވަރަށް ދަތި ދުވަސްތަކެއް ކަމަށާއި މި ހިނގާ ހުރިހާ ކަންތައްތަކަށް ބަލާއިރު ދިވެހިރާއްޖޭގެ ރައްޔިތުން ސާމްޕަލްއެއް ނަންގަވައިފި ނަމަ، މިވަގުތު 10 މީހުން ނެގިޔަސް، 10 މީހުންގެ ތެރެއިން 10 މީހުން ބުނާނީ ތިމަންނަމެން މިހާރު މިހިނގާ ސަރުކާރުން ކުރާ ކަންތައްތަކާއި ހިތްހަމަ ނުޖެހޭ ކަމަށެވެ.

ދެން ބާއްވާ ރިޔާސީ އިންތިހާބާ ގުޅޭ ގޮތުން ވެސް ރައީސް ޔަމީން މިއަދު ވާހަކަފުޅު ދެއްކެވިއެވެ. ވިދާޅުވީ ރާއްޖެއަށް ދިމާވެފައިވާ ބައެއް މައްސަލަތައް ހައްލު ކުރެއްވުމަށްޓަކައި ގައުމަށް ހިދުމަތް ކުރެއްވުމުގެ ފުރުސަތެއް އަދިވެސް ބޭނުންވެވަޑައިގަންނަވާ ކަމަށެވެ.

ވެރިކަމަށް ވަޑައިގަންނަވަންޖެހޭ ތިން ކަމެއް އެބަ އޮތް ކަމަށް ޔާމީން ވިދާޅުވި ނަމަވެސް އެމަނިކުފާނު ފާހަގަ ކުރެއްވީ ދެ ކަމެކެވެ. އޭގެ ތެރެއިން އެންމެ ބޮޑު ކަމަކީ ފޯޅަވަހި ކަނޑުގެ ސަރަހައްދުން ގެއްލުނު ބައި އަނބުރާ ރާއްޖެއަށް ހޯދުން ހިމެނެއެވެ.

މިދިޔަ އަހަރުގެ ރިޔާސީ އިންތިހާބުގައި ރައީސް ޔާމީނަށް ޕީޕީއެމްގެ ރިޔާސީ ޓިކެޓް އެރުވިއެވެ. އެކަމަކު އިންތިހާބުގައި ވާދަކުރެއްވުމުގެ ފުރުސަތު ގެއްލުނީއިއްވި ނުހައްގު ޖަލު ހުކުމަކާ ގުޅިގެންނެވެ.