ދީނުގެ އަސާސުތަކަށް ގޮން ޖަހާ ސަމޯއާ އެގްރިމެންޓުގައި ސޮއިކުރި ފުރަތަމަ ސަރުކާރަކީ ރައީސް މުހައްމަދު މުއިއްޒުގެ ސަރުކާރުކަން ރައީސް އަބްދުﷲ ޔާމީން ފާހަގަކުރައްވައިފިއެވެ.

ރައީސް ޔާމީން މިފަދައިން ވިދާޅުވީ، ރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މަޖިލީހުގެ މި ދައުރު ނިންމާލެވުނީ ކާމިޔާބުކަމާ އެކީ ކަމަށާ އަދި ރައީސް މުއިއްޒުގެ ސަރުކާރުން ގާނޫނު އަސާސީއާ ޚިލާފުކަމެއް ނުކުރާ ކަމަށް މަޖިލީހުގެ ރައީސް އަދުރޭ ހާމަކޮށްފައިވާތީ އެކަމަށް އިޝާރާތްކުރައްވާ ރައީސް ޔާމީން ވިދާޅުވީ، ރައީސް މުއިއްޒު ގާނޫނާ ޚިލާފުކަމެއް ނުކުރެއޭ ބުނަން އަދުރޭއަށް ވެސް ނުކެރުނު ކަމަށާ އެގޮތުން ރައީސް މުއިއްޒު ވަނީ ދިވެހިރާއްޖޭގައި ހިނގަން ވާނީ އިސްލާމީ ޝަރީއަތްކަމަށް ބަޔާންކޮށްފައިވާއިރު އެ ދީނުގެ އަސާސްތަކާ ޚިލާފު އެތައްކަންކަން ހިމެނޭ މުއާހަދާއެއްގައި ސޮއިކޮށް ދީނަށް ގޮންޖަހައިފާކަން ރައިސް ޔާމީން ފާހަގަކުރެއްވިއެވެ.

ރައީސް ޔާމީން ވިދާޅުވީ އެފަދަ ކަންކަން ސަރުކާރުން ކުރަމުން ގެންދާއިރު އެކަންކަން ހުއްޓުވާ ޖަވާބުދާރީ ކުރުވަން އޮންނަ މުއައްސަސާއަކީ ރައްޔިތުންގެ މަޖިލިސް ނަމަވެސް އެ ޒިންމާ މަޖިލީހުން މިއަދު އަދާ ނުކުރާ ކަމަށާ މެމްބަރުން ތިބީ ގޮނޑި ގެއްލިދާނެތީ ސަރުކާރާ ދެކޮޅަށް ބަހެއް ބުނަން ނުކެރިފައި ކަމަށެވެ.