ރައީސް ޑރ. މުހައްމަދު މުއިއްޒު ސިކުނޑީގެ މަސައްކަތްކުރަނީ އެންމެ %5 ތޯ ވިދާޅުވި ވ. އަތޮޅު ކައުންސިލްގެ ރައީސް ޝުޖާއު އަލީ ސުވާލު ކުރައްވައިފި އެވެ.

ޝުޖާއު "އެކްސް" ކުރެއްވި ޕޯސްޓެއްގައި ވިދާޅުވީ އުޅެއުޅެފަވެސް ތިޔަދެއްކެވެނީ މުޅި ދައުލަތުގެ އާމުދަނީގެ %5 ހަރަދުކުޑަކުރާނެ ގޮތުގެ ވާހަކަ ކަމަށާއި %95 އަށްވުރެ %5 ބޮޑީތޯ ޝުޖާއު ސުވާލު ކުރެއްވި އެވެ.

ޝުޖާއު މިހެން ވިދާޅުވީ ކައުންސިލްތަކުގައި ފުލްޓައިމްކޮށް ހިދުމަތްކުރާން ކައުންސިލުގެ ރައީސާއި، ނައިބު ރައީސް އެކަނި ތިބޭ ގޮތަށް ކަނޑައަޅައި، ބާކީ ކައުންސިލަރުންނަކީ ޕާޓްޓައިމް މެންބަރުންނަށް ހެދުމަކީ އެ މަނިކުފާނު ހުށަހަޅުއްވާ ހިޔާލުކަމުގައި ވިދާޅުވެ، އެ ކަމުގައި އާންމުންގެ ހިޔާލު ވެސް ފާޅުކުރެއްވުމަށް ރައީސް ޑރ. މުހައްމަދު މުއިއްޒު ރޭ އެދިވަޑައިގަތުމާއި ގުޅިގެން ނެވެ.

ގއ. އާއި ގދ. އަށް މިހާރު ކުރައްވަމުން ގެންދަވާ ދަތުރުފުޅުގައި ގދ. ފިޔޯރީގައި ބޭއްވި ޖަލްސާގައި އެ މަނިކުފާނު ވިދާޅުވީ ދައުލަތުގެ ހަރަދު ކުޑަކުރަން ވަރަށް ގިނަ ފިޔަވަޅުތައް އަޅަން ޖެހޭ ކަމަށެވެ.

އެގޮތުން އެމަނިކުފާނަށް ފެންނަ ގޮތަކީ ކައުންސިލަރުންގެ އަދަދު މަދު ނުކޮށް، ފުލް ޓައިމްކޮށް ތިބޭނީ ރައީސާއި ނައިބް ރައީސް އެކަނި ކަމަށް ކަނޑައެޅުން ކަމަށް ވިދާޅުވި އެވެ.

ރައީސް ވިދާޅުވީ، ތަރައްގީ ވެފައިވާ ގިނަ ގައުމުތަކުގައި ވެސް އެ ގޮތަށް ކައުންސިލަރުން ތިބޭ ކަމަށެވެ.

ބައިވެރިވާ ކޮންމެ ޖަލްސާއަކަށް އެލަވަންސެއް ދޭ ގޮތަށް ބަދަލެއް ގެނެސްފި ނަމަ ޑިމޮކްރެޓިކް ރިޕްރެޒެންޓޭޝަނަށް ވެސް ބަދަލެއް ނާންނަ ކަމަށާއި އޭރުން ބޮޑު ހަރަދެއް ސަލާމަތް ވާނެ ކަން އެ މަނިކުފާނު ފާހަގަކުރެއްވި އެވެ.

މީގެ ކުރިން ވެސް ރައީސްވަނީ ދައުލަތުގެ ހަރަދުކުޑަކުރަން ކައުންސިލްތައް އެކުލެވިގެންވާ އޮނިގަނޑަށް ބަދަލު ގެންނަން ޚިޔާލުފުޅު ފާޅުކުރައްވައިފައެވެ. އެއިރު ރައީސްގެ ވިސްނުންފުޅަކީ ކައުންސިލަރުންގެ އަދަދު މަދުކުރުމެވެ.

އެއާއެކު އެމްޑީޕީ ހިމެނޭހެން ގިނަ ސިޔާސީ ޕާޓީތަކުގެ ފާޑުކިޔުމާއި، ކަންބޮޑުވުން ވަރަށް ބޮޑަށް އަމާޒުވި އެވެ. އަދި ބައެއް ކައުންސިލަރުންނާއި، ކައުންސިލްތަކުން ވެސް ކަންބޮޑުވުން ފާޅުކުރިއިރު އާންމުންގެ ތެރެއިން ވެސް ނުރުހުން އަމާޒުވި އެވެ.