ދިވެހިރާއްޖޭގެ ގާނޫނޫ އަސާސީއިން ދިވެހި ރައްޔިތުންނަށް ލިބިދިފައިވާ ހައްގެއް ކަމަށްވާ ޚިޔާލުފާޅުކުރުމާ އިހުތިޖާޖުކުރުމުގެ ހައްގުގެ ބޭނުންހިފާކަމުގައިވަނީ ނަމަ އެބަޔަކާ މެދު ފިޔަވަޅު އަޅާނެކަމުގެ އިންޒާރު ސަރުކާރުން ދިވެހީންނަށް ދީފިއެވެ.

މިފަދަ އިންޒާރެއް ސަރުކާރުގެ ފަރާތުން ދީފައިވަނީ ބުރާސްފަތި ދުވަހުގެ ރޭ ޕީއެންސީ ހައުސްގައި ބޭއްވި ޖަގަހަ ޖަލްސާގައި އެ ޕާޓީގައި ތިއްބަވާ އެންމެ އަޑު ހަރު ދެ މެމްބަރުންގެ ތެރޭގައި ހިމެނިވަޑައިގަންނަވާ ބާރަށު ދާއިރާގެ މެމްބަރު އިބްރާހިމު ޝުޖާއުއެވެ.

ޝުޖާއު ދިވެހީންނަށް ބިރު ދެއްކުމުގެ ނިޔަތުގައި ނިކަން އަޑުހަރުކޮށް ވަނީ ރޭގެ ޖަލްސާގައި ބޮޑުފިނޮޅު ވިއްކުމާ ދެކޮޅަށް ކުރާ އިހުތިޖާޖުގެ ބައިވެރިންނަށް އިންޒާރުދީފައެވެ.

އެގޮތުން ޝުޖާއު ވަނީ ދިވެހިރާއްޖޭގައި ކުރިއަށްދާ މަޝްރޫއުތަކެއް މީގެ ފަހުން މުޒާހަރާކޮށްގެން ނުުހުއްޓޭނެ ކަމަށް ބުނެފައެވެ. އޭނާ ހާމަކުރި ގޮތުގައި އެހެން އިހުތިޖާޛުކުރުމުން މަޝްރޫއުތައް ހުއްޓުމުގެ ފުރުސަތު އޮވެއެވެ. ޝުޖާއުވަނީ އެފަދަ އިހުތިޖާޖުތައް ކިުރުވަނީ އެމްޑީޕީ އަޑީގައި ތިބެގެން ކަމަށް ވެސް ބުނެފައެވެ.

އެހެންކަމުން އެކަންކަމަށް ހިތްވަރުދޭ މީހުން، އެއީ ވެރިކަން ކޮށްފައި ހުރި މީހެއްތޯ ނޫންތޯ ނުބަލާ ގާނޫނީ އިމުގެ ތެރެއިން އެމީހަކަށް ދޭންޖެހޭ ހައްގު އަދަބުދޭން މި ސަރުކާރުން ފަސް ނުޖެހޭނެކަމަށްބުނެ ޝުޖާއުވަނީ ދިވެހީންގެ ރާއްޖޭގައި ދިވެހީންނަށް އިންޒާރުދީފައެވެ.

ޝުޖާއު މިފަދައިން އިންޒާރުދީފައިވާއިރު، ވ އަތޮޅުގައި އޮންނަ ހަމައެކަނި ދޮންވެލި ފިނޮޅު މި ސަރުކާރުން ވަނީ ނުއަގެއްގައި ވިއްކާލަން ނިންމާލާފައެވެ. އަދި އެކަމާއި ގުޅިގެން އެ ފިނޮޅުގައި ވ އަތޮޅާއި ކ އަތޮޅުގެ ގެސްޓްހައުސް އަދި ސަފާރީ ހިންގާ ފަރާތްތަކުން ވަނީ އެތަން ވިއްކުމާއި ދެކޮޅަށް މުޒާހަރާކޮށްފައެވެ.

ޚިޔާލުފާޅުކުރުމުގެ މިނިވަންކަމަށް އަރައިގަންނާނެ ކަމުގެ އިންޒާރު ޝުޖާއު ދީފައިވާއިރު މި ބޭފުޅުންނަކީ އެމްޑީޕީ ސަރުކާރުގައި އެ މިނިވަންކަން ނުދީގެން އެންމެ ބާރަށް ހަޅޭއްލެވި ބޭފުޅުންކަން ފާހަގަކޮށްލެވެއެވެ. އަދި މި ބޭފުޅުން އޭރު ވިދާޅުވީ، މި ބޭފުޅުންގެ ވެރިކަމެއްގައި ޚިޔާލުފާޅުކުރުމުގެ މިނިވަންކަމަށް އިމެއް ނެތް މިންވަރަށް ފުރުސަތު ދޭނެ ކަމަށެވެ. ނަމަވެސް ވެރިކަމަށް އައިސް ފެނިގެން ދަނީ ނޫސްވެރިންނަށްވެސް ނުފޫޒު ފޯރުވަން މަސައްކަތްކުރަމުންދާ މަންޒަރެވެ.