ވ. ބޮޑުފިނޮޅު ވިއްކާލުމާ ދެކޮޅަށް ވ. އަތޮޅު ރައްޔިތުން ކޮޅުދިއްފުށި ފަޅުގައި މުޒާހަރާ ކުރަން ފަށައިފިއެވެ.

މިކަމާ ގުޅިގެން ތޭރަ އޮންލައިނަށް މައުލޫމާތު ދެމުން އެ މުޒާހަރާގެ ބައިވެރިއަކު ބުނީ، މުޒާހަރާގައި އެ އަތޮޅު ހުރިހާ ރަށެއްގެ ރައްޔިތުންގެ އިތުރުން ފަތުރުވެރިކަމުގެ ވިޔަފާރި ކުރަމުންދާ ގިނަ އަދަދެއްގެ މީހުން ވެސް ދަނީ ބައިވެރިވަމުން ކަމަށެވެ.

ތިނަދޫ ކައުންސިލުގެ ރައީސް، ޝިފާގު ހުސެއިންއާ ހަވާލާދީ ބައެއް މީޑީޔާތަކުގައި ރިޕޯޓުކޮށްފައިވާ ގޮތުގައި މުޒާހަރާ ކުރަނީ ބޮޑު ފިނޮޅަކީ ވ. އަތޮޅުގެ އިތުރުން ކ. އަތޮޅާއި އަރި އަތޮޅުގެ ބައެއް ގެސްޓު ހައުސްތަކާއި ރިސޯޓުތަކަށް އަންނަ ފަތުރުވެރިން ވެސް ބޭނުން ކުރާ ތަނަކަށްވެފައި އެ ތަން ވިއްކާލުމަކީ މި ސަރަހައްދުގެ ފަތުރުވެރިކަމަށް ލިބޭ ވަރަށް ބޮޑު ގޮންޖެހުމަކަށް ވާތީ ކަމަށެވެ.

ބޮޑުފިނޮޅަކީ ހުރިހާ ދިޔަވަރެއްގައި ވެސް ވ. އަތޮޅުގައި ހަމައެކަނި ބޭނުން ކުރެވެން އޮތް ފިނޮޅު ކަމަށް ވެސް ޝިފާގު ފާހަގަކުރައްވާފައިވެއެވެ.

ޝިފާގު އިތުރަށް ވިދާޅުވެފައިވަނީ ސުލްހަވެރިކޮށް ކުރާ އެ މުޒާހަރާގައި ސަރުކާރަށް އިއްވަން ބޭނުންވާ އަޑަކީ، މި އަތޮޅުގައި އެ ނޫނީ ފަތުރުވެރިން ގެންގޮސް އެރުވޭނެ އެއްވެސް ތަންކޮޅެއް ނެތް ކަމާ، އެހެންކަމުން މި ފިނޮޅު ވިއްކާ ލުމަށް އަތޮޅު ރައްޔިތުން ނޭދޭ ކަމުގައެވެ.

ބޮޑު ފިނޮޅު ވިއްކާލުމާ ދެކޮޅަށް ކުރާ މުޒާހަރާގެ މައިގަނޑު މަގުސަދަކީ އަތޮޅު ރައްޔިތުންގެ ކަންބޮޑުވުން ސަރުކާރުގެ އިސްވެރިންނާ ހަމައަށް ފޯރުވުންކަން ފާހަގަ ކުރައްވައި ޝިފާގު ވިދާޅުވީ ބޮޑު ފިނޮޅު ވިއްކާލުމާ ދެކޮޅަށް މިހާރުވެސް ޖުމުލަ 71 ވިޔަފާރިއަކުން ސޮއި ކޮށްފައިވާ ކަމަށެވެ.

ބޮޑު ފިނޮޅު ވިއްކާލުމާ ދެކޮޅަށް ތިނަދޫ، ފުލިދޫ، ކެޔޮދޫ، ފެލިދޫ، ގުޅި، މާފުށި، ގުރައިދޫ މި ހުރިހާ ރަށެއް ހިމެނޭހެން ފަތުރުވެރިކަމުގެ ވިޔަފާރި ކުރާ 71 ފަރާތަކުން ވަނީ ޕެޓިޝަނެއްގައި ސޮއިކޮށްފައެވެ.

ބޮޑު ފިނޮޅު ވިއްކާލުމާ ދެކޮޅަށް ކުރާ މުޒާހަރާގެ މައިގަނޑު މަގުސަދަކީ އަތޮޅު ރައްޔިތުންގެ ކަންބޮޑުވުން ސަރުކާރުގެ އިސްވެރިންނާ ހަމައަށް ފޯރުވުމެވެ. ބޮޑުފިނޮޅު ވިއްކާލުމާ ގުޅިގެން ކަންބޮޑުވުން ފާޅުކޮށް ވ. އަތޮޅު ކައުންސިލުން ވަނީ ޓޫރިޒަމް މިނިސްޓަރު، އިބްރާހިމް ފައިސަލްއަށް މިދިޔަ ހޯމަ ދުވަހު ސިޓީއެއް ވެސް ފޮނުވައިފައެވެ.