ސަމޯއާ އެގްރިމަންޓުގެ ދިފާއުގައި ދިވެހި ސަރުކާރުން ދައްކަނީ ބުހުތާނު ވާހަކަ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ އާދިއްތަ ދުވަހުގެރޭ ޕީއެންއެފްގެ އޮފިހުގައި އޮތް އެ ޕާޓީގެ ޖަލްސާގައި އެރެޭގެ މައުޟޫއާސށް އިންސާފުކުރައްވާ ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ދިވެހިރާއްޖެއަކީ ޔުނައިޓެޑް ނޭޝަންސް ޑިކްލަރޭޝަން އޮފް ހިއުމަން ރައިޓްސްގެ ސިގިނެޓަރީ ޕާޓިއަަކަށްވީ ނަމަވެސް ޔޫއެންގައި އިސްލާމީ މައިގަނޑު އުސޫލުތަކާ ޚިލާފު އެއްވެސް ކަމެއް އިސްލާމީ ދައުލަތަކަށް އޭގެ ޒާތުގައި ބަލައިގަންނަން މަޖްބޫރުކުރާ އެއްވެސް ހާލަތެއް ނޯންނަ ކަމަށެވެ. އެހެންކަމުން ސަމޯއާ އެގްރިމަންޓަށް އެއްބަސްވުމަށް އާ ބަސްބުނަން ދިވެހި ސަރުކާރުން ރިފަރ ކުރަނީ ޔޫއެންގެ ޑިކްލަރޭޝަންއަށް ކަމަށްވާނަމަ އެއީ، ސަރުކާރުން ދައްކާ ވަރަށް ބަލި ހުއްޖަތެއް ކަމަށެވެ.

ރައީސް ޔާމީން އިތުރަށް ވިދާޅުވީ، ސިވިލިއަން ޕޮލިޓިކަލް ރައިޓްސްގެ ތެރޭގައިވެސް އެލްޖީބީޓީ ނިހިމެނޭ ކަމަށާ ސިޔާސީ އަދި މަދަނީ ހައްގުތައް ހޯދުމަށް ދީނުގައި ހަރާމްކުރައްވާފައިވާ ކަންތައް ނުހިމެނޭ ކަމަށެވެ.

ބައިނަލްއަގްވާމީ އެއްބަސްވުމެއް ކަމަށްވާ އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް)ގެ "ސަމޯއާ އެގްރީމަންޓް" ގައި ބައިވެރިވާން ދިވެހި ސަރުކާރުން ނިންމާފައިވާއިރު ދީނީ ގޮތުން ފުށު އަރާ ކަންކަން އެ އެގްރިމަންޓުގައި ހިމެނެއެވެ. އެގޮތުން މި އެއްބަސްވުމުގައި ހަ ދާއިރާއަކަށް ބިނާވެފައިވާ ގާނޫނީ އޮނިގަނޑު ހާމަކޮށްފައިވެއެވެ. އެއީ ހިއުމަން ރައިޓްސް އެންޑް ޑިމޮކްރަސީ، ޕީސް އެންޑް ސެކިއުރިޓީ، ޑިވެލޮޕްމަންޓް، އިކޮނޮމިކް ގްރޯތު، ކްލައިމެޓް ޗޭންޖް އަދި މައިގްރޭޝަން އެންޑް މޮބިލިޓީއެވެ.

މީގެ ތެރެއިން ހިއުމަން ރައިޓްސް އެންޑް ޑިމޮކްރަސީގެ ދަށުން އެއް ޖިންސުން ގުޅުން ހިންގަން ފުރުސަތު ދިނުމާއި، އެބޯޝަން ހެދުމުގެ ހުއްދަ ދިނުމުގެ އިތުރުން ދީނީ މިނިވަންކަން ދިނުންވެސް ސަމޯއާ އެގްރީމެންޓުގައި ވަނީ ހިމަނައިފައެވެ.