ސަލަފުއް ސޯލިހުންގެ ގޭތެރެއިން ނުކުތް ވެރިކަމެއްގައި ފެންނަމުން ދަނީ އިސްލާމް ދީނުގެ އަސާސުތަކާ ޚިލާފުވަމުންދާ މަންޒަރު ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރާއްޖެއިން ސަމޯއާ އެގްރިމަންޓުގައި ސޮއިކޮށް އެކަން ދިފާއުކުރަން ތަފާތު ގިނަ ބަހަނާ ދައްކަވަމުން ގެންދަވާތީ އެކަމާ ނުރުހުން ފާޅުކުރައްވާ ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ސަމޯއާ އެގްރިމަންޓުގައި ސޮއިކޮށް ދެއްކި އެއް ބަހަނާ އަކީ ދަޅު މަހުގެ ޖީއެސްޓީ ކެނޑުން ނަމަވެސް އެކަން އަދިވެސް ނުވާ ކަމަށާ އެކަން ނުވެސް ވާނެ ކަމަށް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ ސަރުކާރުގެ އެކި ލެވެލްގައި ހުންނަވާ އެމަނިކުފާނު އަމިއްލަފުޅަށް އެ މައްސަކަތްކުރެއްވި ކަމަށާ އެހެންކަމުން ތަޖުރިބާގެ އަލީގައި ވިދާޅުވެވެން އޮތީ އެއީ ވާން ކަމެއް ނޫންކަމަށް ކަން ވެސް ރައީސް ޔާމީން ވިދާޅުވިއެވެ.

މީގެ އިތުރުން ސަމޯއާ އެގްރިމަންޓަކީ ކަނޑައެޅިގެން އިސްލާމީ އަގީދާއާ ޚިލާފު އެތައްކަމެއް ހިމެނޭ އެގްރިމަންޓަކަށްވާއިރު އެ އެގްރިމަންޓުގައި ސޮއިކުރިއިރުވެސް އަދި އޭގެ ފަހުންވެސް، ސަރުކާރަށް ތާއީދުކޮށްގެން ތިބި ދީނީ އިލްމުވެރިންގެ ބަހެއް އެކަމުގައި ނެތުމަކީ އިލްމުވެރިން އެ އިލްމުވެރިންގެ ޒިންމާ ފުރިހަމައަށް އަދާ ނުކުރާކަމުގެ ހެއްކެއްގެ ގޮތުގައި ރައީސް ޔާމީން ފާހަގަކުރެއްވިއެވެ.

ރައީސް ޔާމީން އިތުރަށް ވިދާޅުވީ، ސިވިލިއަން ޕޮލިޓިކަލް ރައިޓްސްގެ ތެރޭގައިވެސް އެލްޖީބީޓީ ނުހިމެނޭ ކަމަށާ ސިޔާސީ އަދި މަދަނީ ހައްގުތައް ހޯދުމަށް ދީނުގައި ހަރާމްކުރައްވާފައިވާ ކަންތައް ނުހިމެނޭ ކަމަށެވެ.

ބައިނަލްއަގްވާމީ އެއްބަސްވުމެއް ކަމަށްވާ އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް)ގެ "ސަމޯއާ އެގްރީމަންޓް" ގައި ބައިވެރިވާން ދިވެހި ސަރުކާރުން ނިންމާފައިވާއިރު ދީނީ ގޮތުން ފުށު އަރާ ކަންކަން އެ އެގްރިމަންޓުގައި ހިމެނެއެވެ. އެގޮތުން މި އެއްބަސްވުމުގައި ހަ ދާއިރާއަކަށް ބިނާވެފައިވާ ގާނޫނީ އޮނިގަނޑު ހާމަކޮށްފައިވެއެވެ. އެއީ ހިއުމަން ރައިޓްސް އެންޑް ޑިމޮކްރަސީ، ޕީސް އެންޑް ސެކިއުރިޓީ، ޑިވެލޮޕްމަންޓް، އިކޮނޮމިކް ގްރޯތު، ކްލައިމެޓް ޗޭންޖް އަދި މައިގްރޭޝަން އެންޑް މޮބިލިޓީއެވެ.

މީގެ ތެރެއިން ހިއުމަން ރައިޓްސް އެންޑް ޑިމޮކްރަސީގެ ދަށުން އެއް ޖިންސުން ގުޅުން ހިންގަން ފުރުސަތު ދިނުމާއި، އެބޯޝަން ހެދުމުގެ ހުއްދަ ދިނުމުގެ އިތުރުން ދީނީ މިނިވަންކަން ދިނުންވެސް ސަމޯއާ އެގްރީމެންޓުގައި ވަނީ ހިމަނައިފައެވެ.