މިދިޔަ އަހަރުގެ ތެރޭ 66،000 އަށްވުރެ ގިނަ މީހުން ޕާސްޕޯޓު ހައްދަން ހުށަހަޅާފައިވާކަމަށް މޯލްޑިވްސް އިމިގްރޭޝަންއިން މައުލޫމާތުދީފިއެވެ.
އިމިގްރޭޝަން އިން މިދިޔަ އަންގާރަ ދުވަހު އެކްސްގައި ކުރި ޕޯސްޓެއްގައި އާންމުކޮށްފައިވާ ގޮތުގައި މިދިޔަ އަހަރު 66،528 ފަރާތަކުން ދިވެހި ޕާސްޕޯޓު ހެއްދުމަށް ވަނީ ހުށަހަޅާފައިވެއެވެ.
އިމިގްރޭޝަން އިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި 66،528 މީހުންގެ ތެރެއިން 13،798 މީހުންނަކީ މުޅިން އަލަށް ޕާސްޕޯޓު ހައްދާފައިވާ މީހުންނެވެ. މީގެއިތުރުން 51،484 މީހުން ޕާސްޕޯޓު ހައްދަން ހުށަހަޅާފައިވަނީ ކުރިން ގެންގުޅުނު ޕާސްޕޯޓުގެ މުއްދަތު ހަމަވުމުންކަމަށް އިމިގްރޭޝަނުން މައުލޫމާތު ދީފައިވެއެވެ.
އިމިގްރޭޝަން އިން މައުލޫމާތު ދީފައިވާގޮތުން 977 މީހަކު ޕާސްޕޯޓު ހައްދަން އެދި ހުށަހަޅާފައިވަނީ ކުރިން ގެންގުޅުނު ޕާސްޕޯޓު ގެއްލުމުންނެވެ. އަދި މައުލޫމާތު ބަދަލުވެގެން 175 މީހުން ޕާސްޕޯޓު ހައްދަން ހުށަހަޅާފައިވާއިރު ޕާސްޕޯޓު ހަލާކުވެގެން 63 މީހަކު އައު ޕާސްޕޯޓަކަށް އެދި ހުށަހަހަޅާފައިވެއެވެ. އަދި މީގެ އިތުރުން ޕާސްޕޯޓުގެ ސޮފުހާތައް ފުރިގެން 31 މީހަކު އައު ޕާސްޕޯޓު ހައްދަން ހުށަހަޅާފައިވެއެވެ.
އެ އިދާރާއިން މިދިޔަ މަހު މައުލޫމާތު ދީފައިވާގޮތުން ހާއްސަ ހާލަތެއް ދިމާވެއްޖެނަމަ މިހާރު އިމިގްރޭޝަނަށް ހާޒިރުވެ ޕާސްޕޯޓަށް އެދި ހުށަހެޅޭނެއެވެ. އެގޮތުން މެޑިކަލް އެމެޖެންސީގައި ޕާސްޕޯޓަށް އެދޭ ފަރާތްތަކަށާއި އުމުރުން 65 އަހަރުން މަތީގެ ފަރާތްތަކަށް އިމިގްރޭޝަނަށް ހާޒިރުނުވެ ޕާސްޕޯޓަށް އެދި ހުށަހެޅޭނެ ހާއްސަ ފުރުސަތުތަކެއް އިމިގްރޭޝަނުން ވަނީ ފަހިކޮށްދީފައިވެއެވެ.
