ރާއްޖޭގައި މަސައްކަތް ކުރާ ބިދޭސީން އުޅެނީ ގާނޫނާއި ގަވައިދާ އެއްގޮތައްތޯ ބެލުމަށް މޯލްޑިވްސް އިމިގްރޭޝަންއިން އޮޕަރޭޝަނެއް ފަށައިފިއެވެ.
“މައިގްރޭޝަން މޮނިޓަރިންގ އެންޑް ކޮމްޕްލައިންސް ޕްރޮގްރާމް” (އެމްއެމްސީޕީ) އިފްތިތާހުކޮށްދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިހުސާނާއި ކޮންޓްރޯލަރ ޖެނެރަލް އޮފް އިމިގްރޭޝަން އަޙްމަދު ފަސީހްއެވެ.
އެ ކޮމިޝަނުގެ ސީނިއާ މެނޭޖްމަންޓާއެކު، އެންފޯސްމަންޓް އެންޑް ކޮމްޕްލައިންސް ޑިވިޝަންގެ އޮފިސަރުންވެސް ވަނީ މި ހަރަކާތުގައި ބައިވެރިވެފައިވެއެވެ.
އެމްއެމްސީޕީގެ އަމާޒަކީ ރާއްޖޭގައި އުޅޭ މީހުން އިމިގްރޭޝަންގެ ގަވާއިދުތަކަށް އަމަލުކުރޭތޯ ބެލުމަށާއި މުޖުތަމައުގެ ސަލާމަތަށް އެހީތެރިވުމަށް ރޫޓިން މޮނިޓަރިން ހަރަކާތްތަކެއް ހިންގުން ކަމަށް އެ ކޮމިޝަނުން ވަނީ ބުނެފައެވެ.
މި އޮޕަރޭޝަންގެ ދަށުން ގަވައިދާ ޚިލާފަށް އުޅެ ބިދޭސީންނަށް އިތުރު ފުރުސަތެއް ނުދީ ޑީޕޯޓު ކުރެވޭނެކަމަށްވެސް އިމިގްރޭޝަންއިން ވަނީ ބުނެފައެވެ.
ގަވައިދާ ޚިލާފަށް ރާއްޖޭގަ އެތައް ބިދޭސީންނެއް އުޅޭ އިރު އަދި މިހާތަނަށް ދާއިމީ ހައްލެއް ގެނެވިފަ ނުވާކަން ފާހަގަކޮށްލެވެއެވެ.
