ވައި ނުސާފުވެ ރާއްޖޭގެ އެއާ ކޮލިޓީ ލެވެލް ދަށަށް ގޮސްފައިވާކަން އެއާ ކޮލިޓީ އިންޑެކްސް އޭ ކިއު އައީ އިން ދައްކައިފިއެވެ.

އޭ ކިއު އައި އިން ދައްކާ ގޮތުގައި މިއަދު ރާއްޖޭގެ އެއާ ކޮލިޓީ ހުރީ 110 ގައެވެ. އެެއީ އެޓް ރިސްކް މީހުންގެ ސިއްހަތައް ގެއްލުން ވެދާނެ ފަދަ ލެވެލެއް ފާހަގަކޮށްލެވެއެވެ.

އެގޮތުން އެއާ ކޮލިޓީ މި ލެވެލްގައި ހުރުމުން ސިއްހީ އަސަރުތައް ކުރިމަތިވާން ފެށުން އެކަނށީގެންވެއެވެ. އެގޮތުން ހާއްސަކޮށް އެޓް ރިސްކް މީހުންނަށް ސިއްހީ ގޮތުން ބޮޑެތި އަސަރުތަކެއް ކުރުން އެކަށީގެންވެއެވެ.

އެގޮތުން ކުޑަކުދިންނާއި އުމުރުން ދުވަސް ވީ މީހުންނާއި، ނޭވާހިއްލުން ފަދަ ނޭވާލާ ނިޒާމުގެ ބަލިތައް ހުންނަ މީހުން ގިނަ ވަގުތު ބޭރުގައި ބުރަކޮށް މަސައްކަތް ކުރުމުން ދުރުހެލިވާން މުހިންމެވެ.

ވައި ނުސާފުވާ ވަގުތުތަަކުގައި ސަމާލުވުމަށް ހެލްތު ޕްރޮޓެކްޝަން އޭޖެންސީ އެޗްޕީއޭ އިން މީގެ ކުރިން އިލްތިމާސްކޮށްފައިވެއެވެ.

އެގޮތުން ވައި ނުސާފުވާ ވަގުތުތަކުގައި ގޭގެ ދޮރުތައް ލައްޕައި، ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑުޖައްސާލުން މުހިންމު ކަމަށެް އެޗްޕީއޭ އިން ހާމަކޮށްފައެވެ.

ރާއްޖެއަށް މިދުވަސްވަރަކީ ވަރަށް ބޮޑަށް ވައި ނުސާފު ވެފައިވާ ދުވަސްވަރެކެވެ. ބައެއް ފަހަރު ހިމާލަޔަން ސަރަހައްދުން ހިރަފުހާއި ދުން، ވަޔާއެކު ބޭ އޮފް ބެންގަލް ހުރަސްކޮށް ރާއްޖެއާ ހަމައަށް ފޯރުމުން ވެސް މިހެން ދިމާވެ އެވެ.