އާންމުކޮށް ބޭނުންކުރާ ކާބޯތަކެތީގެ ބާވަތްތައް ބާޒާރުގައި ވިއްކަން ހުރި އަގުތައް ދަށަށް ދިޔައިރު، ކަރާ ވިއްކަމުން އައި އަގު މައްޗަށް ޖެހިއްޖެއެވެ.
އެގޮތުން ރޯދަ މަހުގެ ފުރަތަމަ ދުވަހު 15 އާއި 20 ރުފިޔާ އާ ދެމެދުގެ އަގަށް ގަންނަން ލިބެން ހުރި ކަރާ ކިލޯ މިހާރު ބާޒާރު ގަންނަން ލިބެނީ 25 ރުފިޔާއަށެވެ. ރަމަޟާން މަހުގެ ދެ ވަނަ ދުވަހު 25 އާއި 30 ރުފިޔާއަށް ކަރާ ކިލޯ ލިބެން ހުރިއިރު، ތިން ވަނަ ދުވަހާ ހަތަރު ވަނަ ދުވަހާ ދެ ދުވަހު ކަރާ ކިލޯއެއް ވިއްކަމުން އައީ 15 އާއި 25 ރުފިޔާ އާ ދެމެދުގެ އަގަކަށެވެ.
ކަރާގެ އަގު އުފުލެމުންދާއިރު، ބާޒާރަށް އެންމެ ގިނަ އަދަދަކަށް ކަރާ ނެރޭ އއ. ތޮއްޑޫގެ ދަނޑުވެރިން ބުނާ ގޮތުގައި އެ ރަށުގައި ކަރާ ކިލޯއެއް ވިއްކަމުން ދަނީ 15 އާއި 18 ރުފިޔާ އާ ދެމެދުގެ އަގަކަށް ކަމުގައެވެ.
ކޮންމެ އަހަރެއްގެ ރޯދަ މަހާ ދިމާކޮށް ރާއްޖޭން ބޭރުން ވެސް ގިނަ އަދަދަކަށް ކަރާ އެތެރެކުރެއެވެ.
