ރައީސް އަދި ނައިބު ރައީސް އާއިއެކު މިނިސްޓަރު ޚަލީލް / ޗެނަލް 13 އިން ނަގާފައިވާ ސްކްރީން ޝޮޓްއެއް
ސިޔާސީ
ގާނޫނުގައި ބުނާ އަދަދަށް ވުރެ ދިވެހި ހާރިޖިއްޔާގައި ސިޔާސީ މީހުން ގިނަކަން ހާމަވެއްޖެ
Mariyam Isaadha
މަރިޔަމް އިސާދާ
10 މާރިޗު 2025
މާލެ ސިޓީ

ގާނޫނުގައި ބުނާ އަދަދަށް ވުރެ ދިވެހި ހާރިޖިއްޔާގައި ސިޔާސީ މީހުން ގިނަކަން ހާމަވެއްޖެއެވެ.

މި ސަރުކާރަކި 700 އަށް ވުރެ ގިނަ ސިޔާސީ މަގާމު ނުއުފައްދާނެކަމުގެ ވައުދާ އެކު އައި ސަރުކާރެކެވެ. ނަމަވެސް މި ސަރުކާރަށް އަހަރުވެސް ނުވަނީސް ސިޔާސީ މަގާމުތަކުގެ އަދަދު 2000 އަށް ވުރެ މައްޗަށް ގޮސްފައިވާ ކަމަށް އެކި މަސްދަރުން ހާމަވެފައިވެއެވެ. އެކަންކަން ހާމަވާން ފެށުމުން ސަރުކާރުން ސިޔާސީ މީހުންގެ ތަފްސީލު މައުލޫމާތު ހޯދާ ލިބިގަތުމުގެ ގާނޫނުގެ ތެރެއިން ހޯދަން ހުށަހެޅުމުން ވެސް ނުދީ ހިފަހައްޓާފައިވެއެވެ. ޚާއްސަކޮށް ރައީސް އޮފީހުން ގާނޫނާ ޚިލާފަށް އެ އަމަލު ހިންގާފައިވެއެވެ.

މިކަންކަން މިހެން ހުއްޓާ ގާނޫނުގައި ބަޔާންކުރާ އަދަދަށް ވުރެ އިތުރަށް ހާރިޖީ ދާއިރާއަށް ސިޔާސީ މުވައްޒަފުން އައްޔަނުކޮށްފައިވާ ކަމުގެ މައުލޫމާތު ލިބޭ ކަމަށް ވިދާޅުވެ، ސީދާ އަދަދު ސާފުކުރުމަށާ އަދި އެ ކަމަށް ލިޔުމުން ޖަވާބު ދިނުމަށް އެދި ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހިމް، ފޮރިން މިނިސްޓަރު ޑރ. އަބްދުﷲ ހަލީލަށް ސިޓީއެއް ފޮނުވާފައިވެއެވެ.

އެ ސިޓީއަށް ފޮރިން މިނިސްޓަރު ޑރ. އަބްދުﷲ ހަލީލް ލިޔުމުން ފޮނުއްވި ޖަވާބުގައިވާ ގޮތުން، ކުރީގެ އެމްޑީޕީ ސަރުކާރުގައި ވެސް ހާރިޖިއްޔާއަށް ސިޔާސީ މުވައްޒަފުން އައްޔަނުކޮށްފައިވަނީ ގާނޫނުގައި ބަޔާންކޮށްފައިވާ ނިސްބަތަށް ވުރެ އިތުރަށެވެ.

އެގޮތުން، ކުރީގެ ސަރުކާރުގެ އެންމެ ފަހު މަސް، 2023 ވަނަ އަހަރުގެ އޮކްޓޯބަރު މަހުގެ ނިޔަލަށް، މިނިސްޓްރީ އާއި މިޝަންތަކުގައި ފޮރިން ސާވިސްގެ 137 މުވައްޒަފުން ތިބިއިރު، މިނިސްޓްރީ އާއި މިޝަންތަކުގައި 116 ސިޔާސީ މުވައްޒަފުން ތިބި ކަމަށް އެ ސިޓީގައި ބަޔާންކޮށްފައިވެ އެވެ.  އެއީ ފޮރިން ސާވިސް މުވައްޒަފުންގެ ނިސްބަތުން ބަލާނަމަ، ގާތްގަނޑަކަށް 84 ޕަސެންޓެވެ.

އެ ސިޓީގައި ބުނެފައިވާ ގޮތުގައި، މި ސަރުކާރުގައި، މި އަހަރުގެ ޖެނުއަރީ މަހުގެ ނިޔަލަށް، މިނިސްޓްރީ އާއި މިޝަންތަކުގައި ފޮރިން ސާވިސް މުވައްޒަފުންގެ ޖުމްލަ އަދަދަކީ 139 އެވެ. އަދި އެ މުއްދަތުގެ ތެރޭގައި، މިނިސްޓްރީ އާއި މިޝަންތަކަށް އައްޔަނުކޮށްފައިވާ ސިޔާސީ މުވައްޒަފުންގެ އަދަދު 132 އަށް އަރައެވެ.  އެއީ ފޮރިން ސާވިސް މުވައްޒަފުންގެ ނިސްބަތުން، 95 ޕަސެންޓެވެ.

އެހެންކަމުން މި ސަރުކާރުން ވެސް ހާރިޖި ދާއިރާއަށް ސިޔާސީ މީހުން އައްޔަންކޮށްފައިވަނީ ގާނޫނު ތަންނުދޭ މިންވަރަކަށް މިވަނީ ހާމަވެފައެވެ.

ފޮރިން ސާވިސްގެ ގާނޫނުގެ 41 ވަނަ މާއްދާގެ (ށ) – މި މާއްދާގެ (ހ) ގެ (1) ވަނަ ނަންބަރާއި (4) ވަނަ ނަންބަރުގައި ބަޔާންކުރާ މުވައްޒަފުން އައްޔަންކުރަންވާނީ ފޮރިން ސާވިސް ގެ މުވައްޒަފުންގެ ޖުމްލަ ޢަދަދުގެ 20 ޕަސެންޓަށް ވުރެ ގިނަ ނުވާނެ ގޮތެއްގެ މަތިން ކަމަށް ވަނީ ބަޔާންކޮށްފަ އެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved