މިޔަންމާއަށް މިދިޔަ ހުކުރު ދުވަހު 7.7 މެގްނިޓިއުޑްގެ ބާރުމިނުގައި އައި ބިންހެލުމުގައި މަރުވި މީހުންގެ އަދަދު 700 އާ ގާތްކޮށްފައިވާ ކަމަށް އެ ގައުމުގެ އަސްކަރީ މީޑިއާ ޗެނަލްތަކާއި ހަވާލާދީ ދައުލަތުގެ މީޑިއާ އިން ބުނެފި އެވެ.

ވެއްޓިފައިވާ އިމާރާތްތަކުގެ ދަށުގައި އަދިވެސް އެތައް ބަޔަކު ތާށިވެފައި ތިބޭނެ ކަމަށް ބެލެވޭތީ، އެ އަދަދު އިތުރުވާނެ އަދިވެސް މަތިވާނެ ކަމަށް ބެލެވޭ ކަމަށް ކަމާބެހޭ ފަރާތްތަކުން ބުނެއެވެ.

މިޔަންމާގެ މެދުތެރޭގެ ސާގިން ސިޓީގެ ހުޅަނގު އުތުރުން މެންދުރު ފަހު ބިންހެލުން އައި ބިމުގެ ތިލަ ހިސާބަކަށް ކަމަށް އެމެރިކާގެ ޖިއޮޖިކަލް ސާވޭ (ޔޫއެސްޖީއެސް)އިން ބުނެ އެވެ. ބާރުގަދަ ބިންހެލުމަށް ފަހު، 6.4 މެގްނިޓިއުޑްގެ އާފްޓާޝޮކެއް ވެސް އައިސްފައިވެ އެވެ. ބިންހެލުމުގައި އެންމެ ބޮޑެތި ގެއްލުންތަކެއް ލިބިފައި ވަނީ މިޔަންމާގެ މެދުތެރޭގައި އޮތް މަންދަލީއާއި ނީޕީޓޯއަށެވެ.

މިޔަންމާގެ އަސްކަރީ ސަރުކާރުގެ އިސްވެރިޔާ މިން އަންގް ހިލައިންގް ވިދާޅުވީ، ބިންހެލުމުގެ ސަބަބުން އެ ގައުމުން ގާތްގަޑަކަށް 1600 މީހުން މަރުވެ، 3530 މީހުން ޒަހަމުވެފައިވާ ކަމަށެވެ. މީގެ އިތުރުން 140 މީހަކު ގެއްލިފައިވާ ކަމަށް ވެސް މިޔަންމާއިން ބުނެފައިވެ އެވެ.

މިޔަންމާއަކީ އާންމުކޮށް ބިންހެލުން އަންނަ ގައުމަކަށް ނުވާތީ މިކަމުގެ ތަޖުރިބާ ކުޑަވެފައި މިކަމަށް ބޭނުންވާ އާލާތްތައް އެ ގައުމުގައި މަދުކަމަށްވެ އެވެ. އަނެއްކޮޅުން ބިންހެލުމުގެ ސަބަބުން މިޔަންމާގެ މަގުތަކާއި ހައިވޭތައް ވަރަށް ބޮޑަށް ހަލާކުވެ ބައެއް ސަރަހައްދުތަކަށް ވަދެވޭނެ މަގުތައް ބަންދުވެފައިވާތީ އެހީ ފޯރުކޮށްދިނުމުގެ މަސައްކަތަށް ވަރަށް ބޮޑަށް ހުރަސްއެޅިފަ އެވެ.

މި ބިންހެލުން ތައިލެންޑަށް ވެސް އަރާފައިވާއިރު، އެ ގައުމުގެ ވެރިރަށް ބެންކޮކުން 10 މީހުން މަރުވެފައިވާ ކަމަށް އެ ސިޓީގެ ކަމާބެހޭ ފަރާތްތަކުން ބުނެއެވެ. ނަމަވެސް، ތައިލެންޑްގައި ވެސް މި އަދަދުތައް މައްޗަށް ދިޔުން އެކަށީގެންވާ ކަމަށް ރިޕޯޓްތައް ބުނެއެވެ.

އެންމެ ގިނަ މީހުން މަރުވެފައިވަނީ އުސް އިމާރާތް ވެއްޓުމުގެ ސަބަބުން ކަމަށެވެ. ނަމަވެސް އެތަނުން އަދިވެސް 110 މީހަކު ނުފެންނަ ކަމަށް ވިދާޅުވި އެވެ.

ބެންކޮކްގައި ދަނީ ބިންހެލުމުގައި ވެއްޓުނު ހަދަމުން ދިޔަ 30 ބުރީގެ އިމާރާތުގެ ތެރޭގައި ވަޅުލެވިފައިވާ މީހުންގެ ހަށިތައް ހޯދުމުގެ މަސައްކަތް އަދިވެސް ކުރަމުންނެވެ. ބެންކޮކްގައި މިހާރު ވަނީ ކުއްލި ނުރައްކަލުގެ ހާލަތުވެސް އިއުލާންކޮށްފަ އެވެ.

ބިންހެލުމުގެ ލޮޅުންތަކުގެ އަސަރު ދެކުނުއިރުމަތީ އޭޝިޔާގެ އެހެން ޤައުމުތަކަށް ވެސް ކުރިއެވެ. އޭގެ ތެރޭގައި ތައިލެންޑާއި ޗައިނާގެ ޔުންނާން ޕުރޮވިންސް ހިމެނެއެވެ.