އަލް ޖަޒީރާ ނޫސް އެޖެންސީގެ އޮފީހަށް ސަހްޔޫނީގެ ސިފައިން އަނެއްކާވެސް ވަދެއްޖެ އެވެ.

ރާމަﷲގައި ހުންނަ އަލް ޖަޒީރާގެ އޮފީހަށް ސަހްޔޫނީ ސިފައިން ވަދެ، އެތަނުގައި ހުރި ބައެއް މުހިންމު ސާމާނު އަތުލަގެންފައިވެ އެވެ. މިއީ، މިދިޔަ މަހު ސަހްޔޫނީގެ ސަރުކާރުން އަލް ޖަޒީރާގެ ހަރަކާތްތައް އެގައުމުގައި މަނާކުރުމަށްފަހު، އެ އެޖެންސީގެ އޮފީހަށް ސަހްޔޫނީގެ ސިފައިން ވަތް ދެވަނަ ފަހަރެވެ. މީގެ ކުރިން މެއި މަހުގެ 5 ވަނަ ދުވަހުވެސް ވަނީ އެ އޮފީހަށް ވަދެފައެވެ.

ޣައްޒާއަށް ސަހްޔޫނީއިން ދެމުން އަންނަ ހަމަލާތަކާ ދާދި އެއްވަރަކަށް ހުޅަނގު އައްސޭރީގައި ވެސް ނުތަނަވަސްކަން ވަނީ ބޮޑުވެފަ އެވެ. ސަހްޔޫނީގެ ސިފައިން ދަނީ ކޮންމެ ދުވަހަކުހެން ފަލަސްތީނުގެ ރަށްތަކަށާއި އަވަށްތަކަށް އަރައި، ރެއިޑް ހިންގައި މީހުން ހައްޔަރުކުރަމުންނެވެ.

މިދިޔަ އޮކްޓޯބަރު 7 ވަނަ ދުވަހު ހަމާސްއިން ސަހްޔޫނީއަށް ކުއްލި ހަމަލައެއް ދިނުމާ ގުޅިގެން، ޣައްޒާގައި ސަހްޔޫނީއިން ހިންގަމުން އަންނަ ހަމަލާތަކުގައި ޝަހީދުވި ފަލަސްތީނުގެ ރައްޔިތުންގެ އަދަދު ވަނީ އެތައްގުނައަކަށް އަރާފަ އެވެ. އަދި އެ ސަރަހައްދުގެ ބޮޑު ބައެއް ވަނީ ސުންނާފަތި ކޮށްލާފަ އެވެ