2022ވަނަ އަހަރު ހިންގަމުން އައި ކޯށްތައް 2027 ވަނަ އަހަރާއި ހަމައަށް އަލުން ހުއްދަ ނުހޯދާނަމަ އެ ކޯސް ތައް ބާތިލް ވާނެ ކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ސީއީއޯ ފިޒާނާ ރަޝީދު ވިދާޅުވެއްޖެއެވެ.
ދައުލަދުގެ މީޑިޔާ ޕީއެސްއެމްގެ ޕްރޮގުރާމެއްގައި ވާހަކަ ދައްކަވަމުން ފިޒާނާ ވިދާޅުވީ ހަޔަރ އެޑިއުކޭޝަން މިނިސްޓްރީގައި ރަޖިސްޓްރީވާ ހުރިހާ ތަނަކުން އިންސްޓިޓިއުޓްއެއްގެ ގޮތުގައި ރަޖިސްޓްރީ ވާނަމަ، އެމްއެމްކިއުއެފް ލެވެލް އެކަކުން 10 އަށް ހިންގާ ކޯސްތަކަށް ހުއްދަ ހޯދަންޖެހޭނެކަމަށެވެ.
ކަނޑައަޅާފައި މިވާ އައު އެކްރެޑިޓޭޝަން ގައިޑްލައިންގެ ދަށުން މިހާތަނަށް 565 ކޯހަކަށް އެކްރެޑިޓޭޝަން ދީފައިވާކަމަށާއި، އަދި މި އަހަރުގެ މިހާތަނަށް 132 ކޯހަކަށް އެކްރެޑިޓޭޝަން ދީފައިވާކަމަށް ފިޒާނާ ވިދާޅުވެފައި ވެއެވެ.
މީގެއިތުރުން ފޭސް ޓު ފޭސް ކޮށް ކުރިޔަށް ގެންދިޔުމަށް ހުއްދަދީފައިވާ ކޯހެއް އޮންލައިންކޮށް ކުރިއަށް ގެންދަން އިޝްތިހާރު ނުކުރެވޭނެ ކަމަށްވެސް އޭނާ ވިދާޅުވެފައި ވެއެވެ.
އެމްކިއުއޭގެ އެކްރެޑިޓޭޝަނާ ނުލައި އެއްވެސް ކޯހެއް އިޝްތިހާރުކުރުމަކީ މަނާކަމެއްކަމަށް ފިޒާނާ ވިދާޅުވެފައި ވެއެވެ.
