އިންޑިއާގެ ތާރީޚީ ހިންދޫ ފައްޅީގައި ކަމަށްވާ 800 އަހަރު ވެފައިވާ ދަރްމަސްތަލާ މަންދިރުގައި، ގާތްގަނޑަކަށް ސައްތައެއްހާ މީހުން މަރާލެވިފައިވާ ކަމަށް އެ މަންދިރުގެ ކުރީގެ މުވައްޒަފަކު ހާމަކޮށްފިއެވެ.

މައިގަނޑު ގޮތެއްގައ މި ފައްޅީގައި މަރާލެވިފައިވަނީ އަންހެނުންނާއި ކުޑަކުދިން ކަން ފާހަގަކުރެވެއެވެ. މި މައްސަލައަކީ ތާރީހުގައި އެންމެ ނުރައްކާތެރި ސީރިއަލް މެރުންތަކުގެ ތެރެއިން އެއް މެރުމަށް ވެދާނެ ކަމަށް ބެލެވެއެވެ. މި މައްސަލައާއި ގުޅިގެން އެ މަންދިރުގައި މަސައްކަތް ކުރި މީހާ ވަނީ ޖުލައި 11 ވަނަ ދުވަހު، ހުވައިގެ މަތީގައި ހެކިބަސް ދީފައެވެ. އޭނާގެ ޝަކުވާ ފުލުހުން ބަލައިގަނެފައި ވަނީ ޖުލައި 3 ވަނަ ދުވަހުގައެވެ. 48 އަހަރުގެ މި ފިރިހެން މީހާ ބުނާ ގޮތުގައި އޭނާ އެތާ މަސައްކަތް ކޮށްފައިވަނީ 1995 އިން 2014 އަށެވެ. އަދި އެ މުއްދަތުގެ ތެރޭގައި ފައްޅީގެ ސުޕަވައިޒަރުންގެ އަމުރަށް ސައްތައެއްހާ މަރާލެވިފައިވާ މީހުންގެ ހަށިގަނޑު ވަޅުލަން މަޖުބޫރު ކުރެވުނު ކަމަށް އޭނާ ބުނެއެވެ.

އިންޑިއާ ހިންދޫ ދީނުގެ ޖާތީ ނިޒާމުގައި ދަލިތުންނަކީ އެންމެ ދަށު ދަރައިގައި ތިބޭ ބައެކެވެ. އެމީހުންނަކީ ނަޖިސް ބަޔެއްގެ ގޮތުގައި ބެލެވޭ އަދި އިންޑިއާގައި އެ މީހުންނަށް އަނިޔާ ކުރެވޭ ބައެކެވެ. ނަމަވެސް ފައްޅި ހިންގާ ފަރާތްތަކަކީ މަތީ ފަންތީގެ މީހުންނެވެ. މި ސިއްރު މައުލޫމާތު ހާމަކުރި ފަރާތުން މިކަން ކުރީ ކޮންބައެއްކަން ސާފު ކޮށް ބުނެދީފައެއް ނުވެއެވެ. ނަމަވެސް އޭނާ ވަނީ ފުލުހުންނަށް ހުށައެޅި ޝަކުވާގައި މުފޫޒު ގަދަ އެތައް ބައެއްގެ ނަން ހާމަކޮށްފައެވެ.

މި މައްސަލައާއި ގުޅިގެން، މަންދިރު ހިންގާ ފަރާތްތަކުން ވަނީ ޙަޤީޤަތް ހޯދުމަށް އިންސާފުވެރި އަދި ހާމަކަން ބޮޑު ތަޙުޤީޤަކަށް ތާއީދުކުރާ ކަމަށް ބަޔާނެއްނެރެ ހާމަކޮށްފައެވެ.

މި ސަރަހައްދުގައި އަންހެނުންނާއި އަންހެން ކުދިން ކުއްލިއަކަށް ގެއްލިގެންދާކަމަށް އެތައް އަހަރެއް ވަންދެން މީހުން ރިޕޯޓްކޮށްފައިވެއެވެ. ނަމަވެސް އާއިލާތަކާއި އެކްޓިވިސްޓް ގުރޫޕްތަކުން ބުނާ ގޮތުގައި އެމީހުންގެ ޝަކުވާތަކަށް އެއްވެސް ނަތީޖާއެއް ނުނިކުމެ، އެއްވެސް ފިޔަވަޅެއް އަޅާފައެއް ނުވެއެވެ. އެއީ ނުފޫޒު ގަދަ މީހުންނާއި، އަދި ފުލުހުން ވެސް އިންޑިއާއާއި ގުޅޭގޮތުން އުފެދޭ ސުވާލުތައް ފޮރުވާލާތީއެވެ. އަދި މި މައްސަލަތަކުން އެންމެ މަޝްހޫރުވި މައްސަލައަކީ 17 އަހަރުގެ ސޯޖަންޔާ ނަމަކަށް ކިޔާ އަންހެން ކުއްޖެއް 2012 ވަނަ އަހަރު މަރާލި މައްސަލަ ހައްލު ނުވެ އޮތުމެވެ.

މި ތަޙުޤީޤުން މިފަދަ ހިތާމަވެރި ހާދިސާތަކަށް އަލިއަލުވާލައި، އިންސާފު ގާއިމްވާނެ ކަމަށް އެންމެންވެސް އުންމީދު ކުރެއެވެ.