އޮޑިހަރުގެއެއްގައި ރޯވެ, ބަންނަމުންދިޔަ އޮޑިއެއް ބޭނުންނުކުރެވޭ ވަރަށް އަނދައިފިއެވެ.

ރޯވެ އަނދާހުލިވެފައިވަނީ ގއ. ވިލިނގިޅިގައި ހުރި އޮޑި ހަރުގެއަކާ އެ އޮޑި ހަރުގޭގައި ބަންނަން ފަށާފައިވާ އޮޑިއެކެވެ.

މިކަމާ ގުޅިގެން އެމްއެންޑީއެފުން މައުލޫމާތު ދެއްވާފައިވާ ގޮތުގައި ރޯވެފައިވަނީ، ވިލިނގިލީގެ މީހުން ނޫޅޭ ސަރަހައްދެއްގައި ހަދާފައި ހުރި އޮޑިހަރުގެއެއްގައެވެ.

އަލިފާން ނިއްވުމަށް ތިނަދޫގެ ފަޔާ ފައިޓަރުން ފޮނުވައިފައިވާ ކަމަށާއި ނަމަވެސް ހަރުގޭގެ ފުރާޅު އަލިފާންގަނޑު މައްޗަށް ވެއްޓި، ބޮޑުބައި ނިވިފައިވާ ކަމުގެ މައުލޫމާތު ލިބިފައިވާ ކަމަށް ވެސް އެމްއެންޑީއެފުން ބުންޏެވެ.

އަލިފާން ރޯވެފައިވާ މަންޒަރު ފެންނަ ވީޑިއޯ އެއް ވަނީ އާންމުވެފައެވެ. ވީޑިއޯ ގައި ފެންނަނީ ވަރަށް ބޮޑަށް ރޯވެފައި ވަނިކޮށެވެ. މި ހާދިސާގައި ލިބުނީ ކިހާ ވަރެއްގެ ގެއްލުމެއް ކަމެއް މިހާތަނަށް އެނގިފައެއްނުވެއެވެ.