ޔަހޫދީން ހައްޔަރުކޮށްފައިވާ ފަލަސްތީނުގެ އިސް ލީޑަރުން، އެއްބަސްވުމާ އެއްގޮތަށް ދޫކޮށްލުމަށް ހަމާސްއިން އިސްރާއީލަށް ގޮވާލައިފިއެވެ.
ޣައްޒާގެ ގަތުލުއާންމު ހުއްޓާލުމުގެ އެއްބަސްވުމުގެ ފުރަތަމަ ފިޔަވަހީގައި، އިސްރާއީލުގެ ޖަލުތަކުން 250 ފަލަސްތީނުގެ ރައްޔިތުން ދޫކުރުމަށް ނިންމާފައިވީނަމަވެސް، ހަމާސް އިން ބޭނުންވާ ފަރާތްތައް އެ ލިސްޓުގައި ހިމަނާފައިނުވާތީ އެކަމާ ހަމާސްއިން ވަނީ ހިތްހަމަނުޖެހުން ފާޅުކޮށް އިސް ލީޑަރުންނާއި ހަމާސްގެ ލިސްޓުގައިވާ ރަހީނުން މިނިވަން ކުރުމަށް ގޮވާލާފައެވެ.
އިސްރާއީލުގެ ޖަސްޓިސް މިނިސްޓްރީން ދޫކުރި 250 ރަހީނުންގެ ލިސްޓުގައި، ފަލަސްތީނުގެ މަޝްހޫރު ދިފާއީ ލީޑަރުން ކަމަށްވާ މަރްވާން ބަރްޣޫތީ އާއި އަހުމަދު ސައާދަތު ފަދަ ހަތް ބޭފުޅެއްގެ ނަން ހިމަނާފައިނުވާތީ، ހަމާސް އިން ދަނީ އެ ބޭފުޅުން ދޫކޮށްލުމަށް ގޮވާލަމުންނެވެ. އެ ބޭފުޅުންނަކީ އިސްރާއީލުގައި ހިންގާފައިވާ ވަކިވަކި ހަމަލާތަކުގައި ބައިވެރިވިކަމުގެ ކުށް ސާބިތުވެ، ޖަލު ހުކުމް ތަންފީޒުކުރަމުންދާ ބޭފުޅުންނެވެ. އެހެންނަމަވެސް، ފަލަސްތީނުގެ ރައްޔިތުންގެ މެދުގައި މި ބޭފުޅުންނަކީ ދިފާއީ ލީޑަރުންގެ ރަމްޒެއްގެ ގޮތުގައި ދެކެމުން އަންނަ ބޭފުޅުންނެވެ.
އެއްބަސްވުމުގެ ދަށުން، ހޯމަ ދުވަހު މެންދުރު 12:00ގެ ކުރިން 20 އިސްރާއީލު ރަހީނުން ދޫކުރުމަށް ވަނީ ހަމަޖެހިފައެވެ.
