ކ. ތިލަފުށީ ފަޅުގައި އަޅާފައި އޮތް ސްޕީޑް ލޯންޗެއް ވަގަށް ނަގައި ގެއްލުންދިން ދެ މީހަކު ހައްޔަރުކޮށްފިއެވެ.

ތިލަފުށީ ފަޅުގައި އޮތް ސްޕީޑް ލޯންޗެއް ވަގަށް ނެގި ކަމަށް ތުހުމަތު ކުރެވިގެން ހައްޔަރުކޮށްފައިވަނީ، ށ. ފޯކައިދޫ, ޗަނބޭލީގޭ، ހަސަން ރަޝީދު އަހްމަދު އަދި ށ. ފޯކައިދޫ، ޝިއުމާމަންޒިލް، އިބްރާހީމް މަމްދޫހެވެ.

މި ދެ މީހުން ހައްޔަރުކޮށް ކޯޓަށް ހާޒިރުކުރުމުން ދެ މީހުންގެ ބަންދަށްވެސްވަނީ ފަސް ދުވަސް ޖަހާފައެވެ. ދެ މީހުން ވެސް ބަންދު މަޖިލީހަށް ހާޒިރުކޮށްފައިވަނީ މިއަދެވެ. މި ދެ މީހުންގެ ތެރެއިން ހަސަން ރަޝީދު އަހްމަދުގެ އުމުރަކީ 30 އަހަރެވެ. އަދި އިބްރާހީމް މަމްދޫހުގެ އުމުރަކީ 27 އަހަރެވެ.

އަދި މި މައްސަލައިގައި ސީސީޓީވީ ސްނެޕްޝޮޓްތައް ހެކީގެ ގޮތުގައި ހުށަހަޅާފައިވާ ކަމަށް ކޯޓު އަމުރުގައިވެއެވެ.

އަމުރުގައި ވިދާޅުވެފައިވަނީ އެ ދެމީހުން ވެސް ވަނީ ޝަރީއަތުގެ މަޖިލީހުގައި ކުށަށް އިއުތިރާފުވެފައި ކަމަށެވެ. އަދި ކުށްކުރެވުނީތީ ހިތާމަކުރާ ކަމަށް ބުނިކަމަށްވެސް އަމުރުގައި ވެެއެވެ.

ބަންދު އަމުރުގައި އިތުރަށް ބަޔާންކޮށްފައިވާ ގޮތުގައި މި ދެ މީހުން ވެސް ކުށަށް އިއުތިރާފުވެފައިވާތީ، ތަހުގީގު މަރުހަލާގައި ވެސް އިއުތިރާފު އެއްބަސްވުން ނުވަތަ ނަސޭހަތުގެ އެއްބަސްވުން ހެދުމުގެ ފުރުސަތު އެ މީހުންނަށް އޮތްކަންވަނީ އަންގާފައެވެ.

މި ދެ މީހުން ކުރެ މީހެއްގެ ބަންދު ރެކޯޑެއް ކުރިން އޮތް ކަމެއް އެނގިފައެއް ނުވެއެވެ.