"އަތޮޅު ދުވުން" ކުޅެގެން ލީޑާބޯޑުގެ އެއްވަނައިގައި ހިމެނޭ ފަރާތަކަށް ދެ މީހުންގެ އުމްރާ ދަތުރެއް ދިނުމަށް ނިންމާފައިވާ ކަމަށް އުރީދޫއިން ހާމަކޮށްފިއެވެ.

ދިިވެހިރާއްޖޭގައި ތައްޔާރުކުރެވިފައިވާ ފުރަތަމަ އެންޑްލަސް ރަނާ ގޭމު ކަމުގައިވާ "އަތޮޅު ދުވުން" ފަށާނީ މި މަހުއެވެ.

މި ދުވުމުގެ ޕާޓްނަރަކީ ގިބްލަ ހައްޖު އެންޑް އުމްރާ ޕްރައިވެޓް ލިމިޓެޑެވެ. މިޕާޓްނާޝިޕުގެ ދަށުން އުރީދޫއާއި ގުޅިގެން މިމަހުގެ ލީޑާބޯޑުގެ އެއްވަނައަށް ދާ ފަރާތަކަށް އުމްރާ ދަތުރެއް (ދެމީހަކަށް) ލިބިގެންދާނެއެވެ. ގޭމްގެ ތެރެއިން ބޯނަސް ޑޭޓާ އަދި މޫލީ ވައުޗާ ލިބުމުގެ ފުރުސަތުވެސް މިމަހު ލިބިގެންދާނެކަމަށް އުރީދޫއިން ވަނީ ބުނެފައެވެ.

އުރީދޫއިން ބުނީ، "އަތޮޅު ދުވުން" ގޭމަކީ ހުރިހާ އުމުރުފުރާއަކަށް ބައިވެރިވެވޭ ގޮތަށް ރާއްޖޭގައި ތައްޔާރުކޮށްފައިވާ ފުރަތަމަ އެންޑްލަސް ރަނާ ގޭމް ކަމަށެވެ. މި ގޭމު އުރީދޫއިން ގުޅުވައިލީ އެ ކުންފުނީގެ އެންމެ ފުރަތަމަ އިޝްތިހާރު ކަމަށްވާ "ހަސަނަށް ފޯނެއް" އިޝްތިހާރާއެވެ.

އެގޮތުން މި ގޭމުގައި އުޅޭ ރާއީ، ހަސަނަށް ފޯނު ދޭންދުވެފައި ދަނީ ރައްޖޭގެ އުތުރުން ދެކުނަށެވެ. އުރީދޫއިން ބުނި ގޮތުގައި މި ގޭމުގައި ކޮންމެ މަހަކު ރާއްޖޭގެ އެއް ރަށް ނުވަތަ ލެވެލެއް އަންލޮކް ވާނެއެވެ.

މިގޭމުގެ އަޕްޑޭޓް މިހާރު ލިބޭއިރު އެޕަލް ސްޓޯރާއި ގޫގުލް ޕްލޭސްޓޯރު މެދުވެރިކޮށް މި ގޭމް ޑައުންލޯޑް ކުރެވޭނެއެވެ.

އެއާއެކު، އުރީދޫއިން ބުނީ އަންނަ މަހު އެއްވަނައަށްދާ ފަރާތަކަށް އުމްރާ ދަތުރެއް ލިބޭނެ ކަމަށާއި މި ގޭމްގެ ތެރެއިން ބޯނަސް ޑާޓާގެ އިތުރުން މޫލީ ވައުޗާ ލިބުމުގެ ފުރުސަތު މާޗު މަހު ލިބޭނެ ކަމަށެވެ.

އަތޮޅުދުވުމުގައި ބާރަ ލެވެލް ހިމެނޭއިރު، ކޮންމެ މަހަކު އާ ލެވެލްއެއްގައި އާ ރަށަކަށް ދަތުރުކުރެވޭނެއެވެ. އެގޮތުން އަންލޮކްވާ ލެވެލް ކުޅެވޭނީ ހަމައެކަނި އެ މަހަކު ކަމަށް އުރީދޫއިން މައުލޫމާތު ދެއެވެ.

މީގެއިތުރުން، އުރީދޫގެ ކަލަންޑަރުގައި ހިމެނޭ މަންޒަރުގައި ސިއްރު އާޓްވޯކެއް ހިމެނޭ ކަން ފާހަގަކޮށް އުރީދޫއިން ބުނީ މި އާޓްވޯކް 'އަތޮޅުދުވުމުން' ހޯދައިގެން ބޯނަސް ލެވެލްއެއް ކުޅުމުގެ ފުރުސަތު ލިބޭނެ ކަމަށެވެ.

އުރީދޫގެ މިއަހަރުގެ ކަލަންޑަރާއި މި ގޭމް ތައްޔާރުކޮށްފައިވަނީ ލޫޕްކްރާފްޓުގެ ހުނަރުވެރި ޓީމަކުން ކަމަށް އުރީދޫއިން ބުނެއެވެ.

މިމަހު އަތޮޅުދުވުމުން ފެންނާނީ ނ.ލަންދޫއެވެ. ލަންދޫއަކީ ޒަމާނުއްސުރެ ގަލު ވަޑާމަށް މަޝްހޫރު ރަށެއް ކަމަށާއި ރާއްޖޭގައި އެންމެ ގިނައިން އުފެދޭ ކުޅައްވަށް ބޭނުންކޮށްގެން ތަކެތި ތައްޔާރުކުރާ ރަށް ކަމަށް އުރީދޫއިން ފާހަގަކުރިއެވެ.