އުރީދޫ މޯލްޑިވްސްގެ ވެރިފައިޑް ކަސްޓަމާ ސަޕޯޓް އެކައުންޓް ވަޓްސްއެޕް މެދުވެރިކޮށް ތައާރަފްކޮށްފި އެވެ.
އެ ކުންފުނިން ބުނީ ކަސްޓަމާ ސަޕޯޓް އެކައުންޓް ވަޓްސްއެޕް މެދުވެރިކޮށް ރާއްޖޭގައި ތިބި އެ ކުންފުނީގެ ކަސްޓަމަރުންނަށް އަވަސް، ރައްކާތެރި އަދި ފަސޭހަ ހިދުމަތްތައް 24 ގަޑިއިރު ލިބޭނެ ކަމަށެވެ. މި ހިދުމަތް ލިބޭނީ 9611929 960+ ނަމްބަރުން ވަޓްސްއެޕް މެދުވެރިކޮށެވެ.
އުރީދޫން ބުނީ މިއީ ޑިޖިޓަލް އިންވޭޝަން މެދުވެރިކޮށް ކަސްޓަމަރުންގެ ތަޖުރިބާ އިތުރުކުރުމަށް ކުރަމުން އަންނަ މަސައްކަތައް ލިބުނު ކުރިއެރުމެއް ކަމަށެވެ.
އުރީދޫން ބުނި ގޮތުގައި ރާއްޖޭގެ ކޮންމެ ހިސާބަކުން ވެސް ކަސްޓަމަރުންނަށް އުރީދޫއާ ގުޅުމަށް ވަޓްސްއެޕް ނަމްބަރުގެ ސަބަބުން އިތުރު ފަސޭހަތަކެއް ލިބި ހިދުމަތްތައް ހަރުދަނާވުމަށް މަގުފަހިވާނެ ކަމަށެވެ. މި ޗެނަލުން ޕްރޮޑަކްޓްތަކާއި ހިދުމަތްތަކާއި ބިލިންއާއި ޓްރަބްލްޝޫޓިން އާއި އެހެނިހެން އެހީތެރިކަން ބޭނުންވާ ކަންކަމާ ބެހޭ އެހީތެރިކަން ފޯރުކޮށްދޭނެ އެވެ.
އުރީދޫން ބުނީ ވަޓްސްއެޕް އަކީ ރާއްޖޭގައި ފުޅާ ދާއިރާއެއްގައި ބޭނުންކުރާ ޕްލެޓްފޯމަކަށްވުމުން މި ޕްލެޓްފޯމުގައި ކަސްޓަމަ ސަޕޯޓު ލިބޭނެ އެކައުންޓެއް ހެދީ ހިދުމަތްތައް މިހާރަށް ވުރެ ފަސޭހައިން ލިބޭނެ މަގު ތަނަވަސްކޮށްދިނުމަށް ކަމަށެވެ. އަދި މި އެކައުންޓަކީ ވެރިފައިޑް އެކައުންޓަކަށްވުމުން މިއީ ރައްކާތެރި އެކައުންޓެއް ކަމަށް ބުންޏެވެ.
