އުރީދޫން ކޮންމެ އަހަރަކު ވެސް ބާއްވާ އެންމެ މަޖާ އަދި ބޮޑު ދުވުން ކާމިޔާބުކަމާ އެކު އިއްޔެ ނިންމާލައިފި އެވެ.

އުރީދޫ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުމެވެ.

އިއްޔެ މެންދުރު ފަހު ހުޅުމާލެއަށް ކޮންމެވެސް ވަރަކަށް އަވިދީފައި އޮތް ނަމަވެސް ދުވުން ހަވީރު 4:30 އެހާއިރު ފެށި އިރު ބޯކޮށް ވާރޭ ވެހެ އެވެ. ދުވުން ފެށުމުގެ އިރުކޮޅެއް ކުރިން ވެސް ދެތިން ފަހަރު ބޯކޮށް ވެހުނެވެ. އެކަމަކު، ދުވުމުގައި ބައިވެރިންގެ ފޯރިއަކަށް ބަދަލެއް ނާދެ އެވެ. ވެހެމުން ދިޔަ ބޯ ވާރެއާ އެކު އެންމެން ވެސް ތިބީ އާ ފޯރިއެއްގަ އެވެ. 

މި ދުވުމުގައި ނައިބު ރައީސް ހުސައިން މުހައްމަދު ލަތީފާއި އުރީދޫ މޯލްޑިވްސްގެ މެނޭޖިން ޑިރެކްޓަރު އަދި ސީއީއޯ ހާލިދްއަލް ހަމާދީ އާއި އެ ކުންފުނީގެ އިސްވެރިން ބައިވެރިވެވަޑައިގަތެވެ.

މި ދުވުމުގެ އުފާވެރި މަޖާ ގިނަ މަންޒަރުތައް ބައިވެރިން ވަނީ ސޯޝަލް މީޑިއާގައި ވެސް ހިއްސާކޮށްފަ އެވެ.

އުރީދޫ ފަން ރަން އަކީ ދުޅަހެޔޮ ސިއްހަތެއްގައި ހުރުމަށް ދުވުން ޕްރޮމޯޓުކޮށް އާއިލާއާ އެކު މަޖާ ވަގުތުކޮޅެއް ހޭދަކުރުމުގެ ފުރުސަތު ދިނުމުގެ ގޮތުން އުރީދޫން ކޮންމެ އަހަރަކު ވެސް ބާއްވާ ދުވުމެކެވެ. މި ދުވުން މާލެ ސަރަހައްދުން ބޭރުގައި ވެސް ބާއްވަ އެވެ.

އަންނަ އަހަރު، ފަން ރަން ފުވަމުލައް އެޑިޝަނެއް ބާއްވާނެ ކަން މިއަދު ވަނީ އިއުލާނުކޮށްފަ އެވެ.