ރައީސް އަބްދުﷲ ޔާމީން އަބްދުލްގައްޔޫމް ގެ ފަރާތްޕުޅުން ދިވެހިރާއްޖޭގެ ހައި ކޯޓަށް ހުށަހަޅާފައިވާ އިސްތިއުނާފް މައްސަލައިގެ ހުކުމް އިއްވުމުގެ އަޑުއެހުން ތާވަލް ނުކުރެވި ލަސްވަމުންދާ ސަބަބު ހައި ކޯޓުން ހާމަކޮށްދެއްވާފައި ނުވާކަމަށް ރައީސް ޔާމީންގެ ޕާޓީ އުފެއްދުމައި އިސްކޮށް ހަރަކާތްތެރިވާ މުހައްމަދު މަލީހް ޖަމާލް ވިދާޅުވެއްޖެއެވެ.

މަލީހް މިފަދައިން ވިދާޅުވެފައިވަނީ ބުދަ ދުވަހު ހައި ކޯޓަށް ވަޑައިގަތުމަށްފަހު ޗެނަލް 13 އަށް ދެއްވި ޚާއްސަ އިންޓަވިއުއެއްގައި ވާހަކަފުޅު ދައްކަވަމުންނެވެ.

އެގޮތުން މަލީހް ވިދާޅުވީ ހައި ކޯޓުން އެބޭފުޅުންނަށް ދެއްވީ ވަރަށް ވެސް ނޭދެވޭ ޖަވާބެއް ކަމަށާއި އެ ޖަވާބުގެ ސަބަބުން ވަރަށް ބޮޑަށް ކަންބޮޑުވާކަމަށެވެ.

"ދިވެހިރާއްޖޭގެ ހައި ކޯޓަކަށް ނޭނގޭ މި މައްސަލަ ތާވަލް ވެގެން ދާނެ ދުވަހެއް..ކޮން އިރަކު ކަމެއް ތާވަލް ވެގެންދާނީ..މި މައްސަލަ އަވަސް ކުރާނެ ގޮތަކާމެދު އަޅާނެ ފިޔަވަޅެއްވެސް ނުވަތަ މައްސަލަ އަވަސްކުރުމަށްޓަކައި ކުރައްވާނެ ކަމެއްގެ މާ ބޮޑު ތަފްޞީލެއްވެސް އެބޭފުޅުންނަކަށް ނުދެވުނު" މަލީހް ވިދާޅުވިއެވެ.

އިތުރަށް މަލީހް ވިދަޅުވީ ރައީސް ޔާމީންގެ މައްސަލަ ވީއެންމެ އަވަހަކަށް ތާވަލް ކުރުމަށް ގޮވާލުމުގައި ދެމިހުންނަވާނެކަމަށެވެ، މި މައްސަލަ ލަސްވަމުންދާ ސަބަބު ބަލާ މައްސަލަ އަށް ޖުޑީޝަލް ކޮމިޝަން ސާވިސް (ޖޭއެސްސީ)ން ވެސް ޚާއްސަ އަަހަމިއްޔަތުކަމެއް ދޭން ޖެހޭ ކަމަށްވެސް މަލީހް ވަނީ ފާހަގަކުރައްވާފައެވެ.

ރައީސް ޔާމީންގެ މައްސަލަ ލަސްވަމުންދާތީވެ ރައީސް ޔާމީންގެ ދޮށީ ދަރިކަލުން ޒެއިން އަދި އެމަނިކުފާނަށް ތާއިދު ކުރައްވާ ގިނަ ފަރާތްތަކުން ވަނީ މި ހަފްތާގެ އާދިއްތަ ދުވަހުވެސް ހައި ކޯޓަށް ވަޑައިގެންފައެވެ.