ޕީޕީއެމް ފިކުރު ގައުމުން އޮޔާދިޔުމަކީ އިޔާދަ ނުކުރެވޭނެވަރުގެ ގެއްލުމެއް ކަމަށް ޕީއެންއެފްގެ ސެކެރެޓަރީ މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވެފައިވަނީ، އެކްސްގައި ކުރެއްވި ޕޯސްޓެއްގައެވެ.
މަލީހު ވަނީ ގައުމީ ފިކުރަކީ ޕީޕީއެމް ފިކުރު ކަމަށާ ނަމަވެސް ރައީސް މުހައްމަދު މުއިއްޒުގެ ދެއުޅިއެއް ނުވާ ސިޔާސަތުތަކުގެ ސަބަބުން އެ ފިކުރާ މެދު ރައްޔިތުންގެ ހިތުގައި އޮތް އިތުބާރާ ޔަގީންކަން ފަނޑުވަމުންދާ ކަމަށް ވިދާޅުވެފައެވެ. އަދި ރައީސް މުއިއްޒު ވެރިކަމަށް ވަޑައިގެން ގައުމީ ފިކުރުގެ އެންމެ މުހިއްމު އެއް ބަހާކަމުގައިވާ ޕީޕިއެމް ސިޔާސީ ޕާޓީއެއްގެ ގޮތުގައި އޮތް އޮތުން ނިމުމަކަށް ގެންނަވާ އަމިއްލަ އެދުން އިސްކުރައްވާ އެ ޕާޓީ ވުޖޫދުން ފޮހެލީކަން ހަނދާނަށް ގެންނަވާ މަލީހު ވިދާޅުވެފައިވަނީ، ޕީޕީއެމްގެ ފިކުރު އޮޔާދިޔައީ ރައީސް މުއިއްޒުގެ ކަންފުޅެއް ނެތުމުން ކަމަށެވެ.
ނަމަވެސް އެ ފިކުރު އޮޔާދިއުމަކީ ގައުމަށް އިޔާދަ ނުކުރެވޭނެވަރުގެ ގެއްލުން ލިބިގެންދާނެކަމެއްގެ ގޮތުގައި ފާހަގަކުރައްވާ މަލީހު ވަނީ އެކަމުގެ ހައްލަކީ ރައީސް މުއިއްޒު މަގާމުން ދުރުކުރުން ކަމަށް ވިދާޅުވެފައެވެ. އަދި ވަކި ފަރުދަކަށްވުރެ ގައުމު ބޮޑުވާނެ ކަމަށް ވެސް މަލީހު ވަނީ ވިދާޅުވެފައެވެ.
