މަސްތުވާތަކެތީގެ މައްސަލައެއްގައި ރ. ރަސްގެތީމު ގެއެއް ބަލައިފާސްކޮށް 9 މީހުން ހައްޔަރުކޮށްފިއެވެ.

ފުލުހުން ބުނީ މި 9 މީހުން ވެސް ހައްޔަރުކޮށްފައިވަނީ އެ ގޭގައި މަސްތުވާތަކެތި ބޭނުންކުރަން ތިއްބާ ކަމަށެވެ. ފުލުހުން ބުނީ އެ މީހުން ހައްޔަރުކޮށްފައިވަނީ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން މި ނޮވެމްބަރު މަހުގެ 1 ވަނަ ދުވަހު ހިންގި އޮޕަރޭޝަނެއްގައި ކަމަށެވެ.

މި މައްސަލައާ ގުޅިގެން ހައްޔަރުކޮށްފައިވަނީ

1. އަހްމަދު ނިހާން (23އ) ރ. ހުޅުދުއްފާރު / ލޫނާ،

2. އިބްރާހީމް ރިޝާމް (36އ) ރ. ރަސްގެތީމު / އިރުދޭމާގެ،

3. އާދަމް ނަސީމް (30އ) ރ. ހުޅުދުއްފާރު / ފަތިސްހަނދުވަރުގެ،

4. އަމީނާ މުހައްމަދު (32އ) ޅ. ނައިފަރު / ހަނަފަސްގެ،

5. އައްޔޫބު އާދަމް (33އ) ރ. ހުޅުދުއްފާރު / އާސްމާނުވިލާ،

6. ފަރީޙާ ބިންތި އަލީ ވަހީދު (21އ) ހދ. ކުޅުދުއްފުށި / ބީޗްސައިޑް،

7. އިބްރާހީމް ޢާދިލް (38އ) ރ. ހުޅުދުއްފާރު / ލައިނޫފަރުގެ،

8. އަހްމަދު ވިޝާމް (41އ) ރ. ރަސްގެތީމު / އިރުދޭމާގެ،

9. ހުސައިން ސަރްހާން (30އ) ރ. ހުޅުދުއްފާރު / އާސްމާނުވިލާ،

ފުލުހުން ބުނީ ހުޅުދުއްފާރު ޕޮލިސް ޕޯސްޓާއި ރަސްގެތީމު ޕޮލިސް ޕޯސްޓު އަދި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި މި އޮޕަރޭޝަންގައި އެ މީހުން ހައްޔަރުކޮށް، އެ ގެ ބަލާ ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއްހުރި 15 ކަރުދާސްކޮޅާއި ދެ ރަބަރު ޕެކެޓު ފެނިފައިވާ ކަމަށެވެ. އަދި މަސްތުވާތަކެތި ބޭނުންކުރަން ގެންގުޅޭކަމަށް ބެލެވޭ ތަކެއްޗާއި 43،500 އަށް ވުރެ ގިނަ ރުފިޔާ ފެނިފައިވާކަމަށް ފުލުހުން ވަނީ ބުނެފައެވެ.

މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އަހްމަދު ނިހާން، އިބްރާހީމް އާދިލް އާއި، އާދަމް ނަސީމް އާއި، އިބްރާހީމް ރިޝާމް 10 ދުވަހަށް ބަންދުކުރުމަށް ވަނީ އަމުރުކޮށްފައެވެ. އަދި އަމީނާ މުހައްމަދު، އައްޔޫބު އާދަމް، ފަރީހާ ބިންތި އަލީ ވަހީދު، އަހްމަދު ވިޝާމް، ހުސައިން ސަރްހާން 30 ދުވަހަށް ބަންދުކުރުމަށް ވަނީ އަމުރުކޮށްފައެެވެ.

މި މައްސަލަ ފުލުހުން ގެންދަނީ ތަހުގީގުކުރަމުންނެވެ.