ދެ އަހަރުގެ ޚާއްސަ އިސްތިސްނާ މުއްދަތު ހަމަވުމުން، ޔޫރަޕިއަން ޔޫނިއަން (އީޔޫ) އިން ރަޝިޔާގެ ތެޔޮ އެތެރެ ކުރުން މަނާ ކޮށްފައިވާތީ ބަލްގޭރިއާއިން ރަޝިޔާގެ ތެޔޮ އެތެރެ ކުރުން ހުއްޓާލައިފިއެވެ.

އީޔޫ އިން މީގެ ދެ އަހަރު ކުރިން ރަޝިޔާގެ ތެޔޮ އެތެރެކުރުން ވަނީ މަނާކޮށްފައެވެ. ބަލްގޭރިއާއަށް ދެ އަހަރުގެ އިސްތިސްނާއެއް ދީފައިވަނީ މިއަހަރުގެ ނިޔަލަށް ދެމިގެންދާނެ ގޮތަކަށެވެ. ނަމަވެސް ބަލްގޭރިއާގެ ޕާލަމެންޓުން ވަނީ ރަޝިޔާއިން ކްރޫޑް އިމްޕޯޓް ކުރުން ނިމުމަކަށް ގެނައުމަށް މިދިޔަ އަހަރުގެ ފަހުކޮޅު އާ ޓައިމްލައިނެއް ފާސްކޮށްފަ އެވެ.

ބަލްގޭރިއާ އިން ރަޝިޔާ އިން އެތެރެކުރުން މުޅިން ހުއްޓާލީ މާޗް މަހުގެ އެއްވަނަ ދުވަހު އެވެ.

މި ހަފްތާގެ ކުރީކޮޅު ބަލްގޭރިއާގެ ބޮޑުވަޒީރު ނިކޮލައި ޑެންކޯވް ވަނީ ރައީސް ވޮލޮޑިމިއާ ޒެލެންސްކީއާ ކިއެވްގައި ބައްދަލުކުރައްވާފަ އެވެ.

ރަޝިޔާއިން ޔޫކްރޭނަށް އެރުމާއެކު ހުޅަނގުގެ ގައުމުތަކުން ރަޝިޔާއާ ދެކޮޅަށް އެޅި ދަތިކުރުމުގެ ފިޔަވަޅުތައް ތަންފީޒް ކުރަން ހަނގުރާމައިގެ ކުރީކޮޅު ބަލްގޭރިއާ ފަސްޖެހުނެވެ. ނަމަވެސް ބަލްގޭރިއާ ވަނީ ހަނގުރާމަ ކުރިއަށްދިޔަ ވަރަކަށް ޔޫކްރޭނަށް ތާއީދުކުރުން އިތުރުކޮށް ރަޝިޔާއާ ދެކޮޅަށް ފިޔަވަޅުތައް އަޅާފައެވެ.

ޒެލެންސްކީ ވަނީ ޑެންކޯވް އަށް ޝުކުރު އަދާކުރައްވައި، "ކަޅު ކަނޑާއި ޑޭނިއުބް ސަރަހައްދުގައި ވިޔަފާރީގެ ދަތުރުތައް ފުޅާކޮށް، ބޯޓުފަހަރުގެ ދަތުރުތައް އާންމު ހާލަތަކަށް ގެނައުމަށް" އެހީތެރިވުމަށް ބަލްގޭރިއާ އިން ދެއްވި އެއްބާރުލުން ފާހަގަ ކުރައްވާފަ އެވެ.

ބަލްގޭރިއާގެ ސަރުކާރު ތާރީހީ އެކުވެރި ރަޝިޔާއާ ދުރަށް ޖެހެމުންދާއިރު، ރަޝިޔާގެ ޖާސޫސުން އެގައުމުގައި ހަރަކާތްތެރިވުމާ ގުޅޭ މައްސަލަތައް ވަނީ ބޮޑުވެފައެވެ.

ބަލްގޭރިއާގެ ޖާސޫސީ އޮޕަރޭޝަންތަކުގައި ރަޝިޔާގެ ދެ ރައްޔިތަކު އީޔޫއަށް ވަނުން މަނާކޮށްފައިވާ ކަމަށް ބަލްގޭރިއާގެ ސަލާމަތީ ހިދުމަތުން ވަނީ ފެބްރުއަރީ 26 ވަނަ ދުވަހުގެ ހެނދުނު އިއުލާންކޮށްފަ އެވެ.