މާލެ ސިޓީ ކައުންސިލްގެ މާފަންނު ހުޅަނގު ދާއިރާގެ މެންބަރު އިބްރާހިމް އަބޫބަކުރު ޕީއެންއެފާއި ގުޅިވަޑައިގެންފިއެވެ.

ޗެނަލް 13 އަށް މައުލޫމާތު ދެއްވަމުން އޭނާ ވިދާޅުވީ، ޕީއެންއެފާއި ގުޅީވަޑައިގަންނަވަން ޖެހުނު މައިގަނޑު ސަބަބަކީ މި ސަރުކާރުން ވެރިކަމަށް އައުމަށްވީ ވައުދު ތަކާއި ޚިލާފުވަމުންދާތީއާއި ރައީސް އަބްދުﷲ ޔާމީން އަބްދުލް ޤައްޔޫމް މިނިވަންކުރަން އެއްވެސް މަސައްކަތެއް ނުކުރާތީކަމަށެވެ.

ޕީއެންއެފަށް ސޮއިކުރަން ޖެހުނު އިތުރު ސަބަބެއްކަމަށް އޭނާ ވިދާޅުވީ، ކުރީގެ މާލެ ސިޓީގެ މޭޔަރު އަދި މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން މާލެ ސިޓީ ކައުންސިލަށް ނުފޫޒު ފޯރުވައި، ކައުންސިލްގެ މަސައްކަތަށް ހުރަސްއަޅަމުންދާތީ ކަމަށެވެ.

މީގެ ކުރިން އިބުރާހިމަކީ ޕީޕީއެމް ޕީއެންސީ ކޯލިޝަނުގެ މެންބަރެކެވެ.

އޭނާ ކައުންސިލް ކަމަށް އިންތިހާބުވެ ވަޑައިގަތީވެސް އެކޯލިޝަންގެ މެންބަރެއްގެ ގޮތުގައެވެ.

ނަމަވެސް ރައީސް ޔާމީންގެ ފަހަތްޕުޅުގައި މަސައްކަތް ކުރެއްވުމަށްޓަކައި އަދި މި ސަރުކާރުގެ ނުފޫޒާއި ދެކޮޅަށް އަޑު އުފުލުމަށްޓަކައި ކަމަށް ބުނެ އޭނާ ވަނީ އެޕާޓީން ވަކިވެފައެވެ.