ސިޔާސީ ގޮތުން އެއްވެސް ދިވެހި ރައްޔިތަކަށް އަނިޔާ ނުކުރުމަށް ޕީއެންއެފްގެ ޓިކެޓުގައި ފުވައްމުލަށް އުތުރު ދާއިރާއަށް ކުރިމަތިލައްވާފައިވާ މުހައްމަދު ޝަރަފުއްދީން މިއަދުގެ ސަރުކާރަށް ގޮވާފައިފިއެވެ.
ޝަރަފުއްދީން މިފަދައިން ވިދާޅުވީ ، ރައީސް ޔާމީން ގެ ޕާޓީ ޕީޕަލްސް ނެޝަނަލް ފްރަންޓް (ޕީއެންއެފް) އިން ކުރިއަށް އޮތް ރައްޔިތުނެގެ މަޖިލިސް އިންތިހާބުގައި ވާދަކުރައްވަން ޝައުގުވެރިކަން ފާޅުކޮށްފައިވާ ކެންޑިޑޭޓުން ތައާރަފް ކުރުމަށް ބޭއްވެވި ޖަލްސާގައެވެ.
ޝަރަފުއްދީން ވިދާޅުވަނީ މިސަރުކާރުން ރައީސް ޔާމީނަށް އަނިޔާ ދިން ފަދައިން އޭނާއަށް އަނީޔާވެރި ވެފައިވާ ކަމުގައެވެ. އަދި ހަމައެއާއެކު ޝަރަފުއްދީން ގޮވާލަނީ ނުހައްގުން ރައީސް ޔާމީން އަށް ދެމުންދާ އަނިޔާތައް ހުއްޓާލާ ރައީސް ޔާމީން މިނިވަން ކުރުމަށެވެ.
އަޅުގަނޑު މި ފުރުސަތުގައި އެންމެ ފުރަތަމަވެސް މިވަގުތު ދިވެހި ރާއްޖޭގެ ރައީސުލް ޖުމްހޫރިއްޔާ ޑރ މުހައްމަދު މުއިއްޒަށް ގޮވާލަން ބޭނުންވަނީ ސިޔާސީ ގޮތުން އެއްވެސް ދިވެހި ރައްޔިތަކަށް އަނިޔާ ނުކުރާށޭ. އަޅުގަނޑުމެން ރައީސް ވީ އެންމެ އަވަހަކަށް މިނިވަން ކޮށްދެއްވާށޭ
މުހައްމަދު ޝަރަފުއްދީން
ހަަމައެއާއެކު ޝަރަފުއްދީން ވިދާޅުވީ ހުސް ގޮޑިއެއް ރައީސް ޔާމީނަށް ބަހައްޓައިގެން، މި ސަރުކާރު ހޮވުމަށް ވީ ގުރުބާނީ ހުރިހާ ދިވެހި ރައްޔިތުންވެސް ހެކިވާނޭކަމަށެވެ.
ޝަރަފުއްދީން އަކީ ރައީސް ޔާމީން މިނިވަން ކުރުމަށް ކުރާ މަސައްކަތްތަކުގައި ފުވައްމުލަކުގައި އެންމެ އިސްކޮށް އުޅުއްވަމުން ގެންދާ އެއްފަރާތެވެ.
އޭނާ ކޮށްދެމުންދާ މަސައްކަތަށް ރައީސް ޔާމީން ވަނީ އިހުލާސްތެރި ޝުކުރެއް އަދާކޮށްފައެވެ.
