ޔަމަނުގެ ހޫތީން ހަމަލާދިން ބޯޓެއް ރަތް ކަނޑުގައި އަޑިއަށް ގޮސްފައިވާ ކަމަށް އޮފިޝަލުން ހޮނިހިރު ދުވަހު ބުނެފި އެވެ.

ރޫބީމާ އަޑިއަށް ގޮސްފައި މިވަނީ އޭޝިއާ އާއި މެދުއިރުމަތިން ޔޫރަޕަށް ދަތުރުކުރާ މުދަލާއި ހަކަތަ ޝިޕްމަންޓްތަކަށް ހޫތީންގެ ހަމަލާތައް އަމާޒު ކޮށްފައިވާ ދަނޑިވަޅެއްގަ އެވެ.

މިހާރުވެސް ގިނަ ބޯޓުތަކެއް ވަނީ އެ މަގުން ދުރަށް ޖެހިލާފައެވެ. އަޑިއަށް ދިއުމުގެ ސަބަބުން މި ރޫޓުގައި ދަތުރުކުރާ އުޅަނދުތަކަށް އިތުރު ޑިޓުއާސްތަކާ އިންޝުއަރެންސް ރޭޓް މަތިވުމަކީ އެކަށީގެންވާ ކަމެކެވެ.

ބެލިޒްގެ ދިދަ ޖަހާފައިވާ ރޫބީމާ ބޯޓަށް ފެބްރުއަރީ 18 ވަނަ ދުވަހު ރަތް ކަނޑާއި އޭޑެން ގަލްފް ގުޅުވައިދޭ މުހިންމު ރޫޓު ބާބުލް މަންދިބް ސްޓްރެއިޓްގައި ހޫތީ އަސްކަރިއްޔާއިން އެންޓި ޝިޕް ބެލިސްޓިކް މިސައިލަކުން ހަމަލާދިނެވެ.

ބައިނަލްއަގްވާމީ ގޮތުން ގަބޫލުކުރާ ޔަމަނުގެ ސަރުކާރުގެ އިތުރުން ސަރަހައްދީ އަސްކަރީ އޮފިޝަލަކު ވެސް ވަނީ ބޯޓު އަޑިއަށް ދިޔަކަން ކަށަވަރުކޮށްދީފަ އެވެ.

މެދުއިރުމަތީގެ ކަނޑުގެ ސަރަހައްދު ބަލަހައްޓާ އިނގިރޭސި އަސްކަރިއްޔާގެ ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް ސެންޓަރުން ވަނީ ހޮނިހިރު ދުވަހުގެ މެންދުރު ފަހު ރޫބީމާ އަޑިއަށް ދިޔަކަން ކަށަވަރުކޮށްފައެވެ.

އިސްރާއީލާއި ހަމާސް ހަނގުރާމައާ ގުޅިގެން ހޫތީން ވަނީ ރަތް ކަނޑާއި ވަށައިގެންވާ ކަނޑުގެ ބޯޓުތަކަށް ތަކުރާރުކޮށް އަމާޒުކޮށްފައެވެ.

އެމެރިކާ އިސްވެ އޮވެގެން މަހަކަށް ވުރެ ގިނަ ދުވަހު ވައިގެ ހަމަލާތައް ދިން ނަމަވެސް، ހޫތީންނަށް އަދިވެސް ބޮޑެތި ހަމަލާތަކެއް ދިނުމުގެ ގާބިލްކަން އެބައޮތެވެ. އޭގެ ތެރޭގައި ރޫބީމާއަށް ދިން ހަމަލާއާއި ދިހަ މިލިއަން ޑޮލަރުގެ އަގުހުރި އެމެރިކާގެ ޑްރޯނެއް ވައްޓާލުން ހިމެނެއެވެ. ހޫތީން ބުނަނީ ޣައްޒާގައި އިސްރާއީލުން ހިންގާ ހަނގުރާމަ ނުހުއްޓާހާ ހިނދަކު ހަމަލާތައް ދެމިއޮންނާނެ ކަމަށެވެ.