ހެއިޓީގެ ބޮޑުވަޒީރު އެރިއެލް ހެންރީ ވެރިކަމުން ދުރުކުރަން އުޅޭ ގޭންގުތަކުން ވެރިރަށް ޕޯޓްއޯ ޕްރިންސް ސިޓީގެ ބައިނަލްއަގްވާމީ އެއާޕޯޓާއި ޖަލެއް ކައިރީގައި ސަލާމަތީ ބާރުތަކާ ދެމެދު ވަރުގަދަ ކުރިމަތިލުންތައް ހިނގައިފިއެވެ.

ހޭޓީހެ ގޭންގް ލީޑަރު ޖިމީ ޗެރިޒިއާ ހުކުރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ އޭނާ ހެންރީ ވަކިކުރަން މަސައްކަތް ކުރަމުން ގެންދާނެ ކަމަށެވެ.

"މި ކުރިމަތިލުންތައް އަހަރެމެން ބޭނުންވާ ދުވަހަކާ ހަމައަށް ކުރިޔަށް ދާނެ. އަހަރެމެން އެރިއެލް ހެންރީއާ ހަނގުރާމަ ކުރަމުން ގެންދާނަން. ކޮލެޓަރަލް ޑޭމަޖް އިން ސަލާމަތްވުމަށްޓަކައި ކުދިން ގޭގައި ބައިތިއްބާ،" ބާބަކިއުގެ ނަމުން މަޝްހޫރު ބާރުގަދަ ގޭންގް ބޮސް ބުންޏެވެ.

ކުރީގެ އެލީޓް ޕޮލިސް އޮފިސަރެއް ކަމަށްވާ ޗެރިޒިއާ އަކީ ޖީ9 އެންޑް ފެމިލީ އެންޑް އެލައިސް ކިޔާ ގޭންގް ފެޑެރޭޝަނުގެ ވެރިޔާއެވެ.

ޕޯޓް އޮ ޕްރިންސްގެ މަގުތަކުގައި ވަނީ އަންދާފައިވާ ބަސްތަކާއި ބެރިކޭޑްތަކެވެ. މި ހަމަނުޖެހުންތަކާ ހެދި ގިނަ ބަޔަކު ވަނީ ސަލާމަތްކަން ހޯދަން އެސިޓީ ދޫކޮށް ގޮސްފައެވެ.

މި ހަފްތާގައި ކެންޔާއަށް ހެންރީ ވަޑައިގަތުމާއެކު ހަމަލާތައް އިތުރުވިއެވެ. ހުކުރު ދުވަހު ދެ ގައުމުން ވަނީ ބައިނަލްއަގުވާމީ ޕޮލިސިން އެންޑް ޕީސްކީޕިން މިޝަނެއް އިއުލާންކޮށް ހޭޓިއަށް 1،000 ފުލުހުން ފޮނުވުމަށް އެއްބަސްވުންތަކެއްގައި ސޮއިކޮށްފަ އެވެ.

ބޮޑުވަޒީރު ހެންރީގެ އޮފީހުން ނެރުނު ބަޔާނެއްގައި ބުނެފައި ވަނީ "ހަތިޔާރު އެޅި ފޭރޭ މީހުންގެ ޓެރަރިޒަމްގެ އަމަލުތައް ކުށްވެރި ކުރާ" ކަމަށާއި، ޝިކާރައަކަށް ވެފައިވާ މީހުންގެ އާއިލާތަކަށް ތައުޒިޔާ ފާޅުކޮށް، މައްސަލަ ހައްލުކުރުމަށް ސަރުކާރުން މަސައްކަތް ކުރަމުން ގެންދާނެ ކަމަށް ބުނެފަ އެވެ.

އދ އިން ބުނާ ގޮތުގައި ހޭޓިގެ ރައްޔިތުންގެ ދެބައިކުޅަ އެއްބައި މީހުންނަކީ ސީރިއަސް ބަނޑުހައިހޫނުކަމުގެ ޝިކާރައަކަށް ވެފައިވާ މީހުންނެވެ.