ރާނިޔާ އަބޫ އަންޒާ ކުއްޖަކު ހޯދުމަށް 10 އަހަރު ތެރޭ އެތައް މަސައްކަތެއް ކުރިއެވެ. ބަނޑުބޮޑުވީ ތިން ބުރު ވިޓްރޯ ފަރޓިލައިޒޭޝަން ނެގި ފަހުންނެވެ. ޓްވިންސް ފިރިހެން ކުއްޖަކާއި އަންހެން ކުއްޖަކު ލިބި، ފަސް މަސް ފަހުން އެ ތުއްތު ކުދިން ގެއްލުނީ އެންމެ ސިކުންތުކޮޅެއް ތެރޭގައެވެ.

ޣައްޒާގެ ދެކުނުގެ ސިޓީއެއް ކަމަށްވާ ރަފާހުގައި ހޮނިހިރު ދުވަހުގެ ރޭ ދަންވަރު އިސްރާއީލުން ދިން ހަމަލާއެއްގައި އޭނާގެ ދަރިންނާއި ފިރިމީހާ އަދި އިތުރު 11 ގާތްތިމާގެ މީހުން ޝަހީދުވެ، އިތުރު ނުވަ މީހަކު ގެއްލިފައިވާ ކަމަށް ސިއްހީ އޮފިޝަލުން ބުނެ އެވެ.

އޭނައަށް ހޭލެވުނީ ރޭގަނޑު 10 ޖަހާ އެހާކަންހާއިރު އެވެ. ދަރިފުޅު ނައީމަށް ގާތުން ކިރުދިނުމަށްފަހު ދަރިފުޅު ވިސާމްއާ އެކީ ނިދިއެވެ. އެމީހުންގެ ކައިރީގައި ފިރިމީހާ ނިދާފައި އޮތެވެ.

ގޮވުން އައީ އޭގެ ގަޑި ބައި ފަހުންނެވެ. އެ ގެ ވެއްޓި ބިމާ ހަމަވި އެވެ.

"އަހަރެންގެ ދަރިންނާއި ފިރިމީހާއަށްޓަކައި ހަޅޭއްލަވައިގަތީ،" ގިސްލަމުން ރޮމުން އޭނާގެ ދަރިންގެ ބްލެންކެޓް މޭމަތީގައި ޖައްސައިގެން އިނދެ ރާނިޔާ ކިޔައިދިނެވެ. ”އެ އެންމެން ތިބީ މަރުވެފަ. އެ ކުދިންގެ ބައްޕަ އެކުދިން ގޮވައިގެން އަހަރެން ދޫކޮށްލާފައި ދިޔައީ.”

ޣައްޒާގައި ހަނގުރާމަ ފެށުނު ފަހުން އިސްރާއީލުގެ ވައިގެ ހަމަލާތައް ތޮއްޖެހިފައިވާ އިމާރާތްތަކަށް ދެމުން ގެންދެއެވެ. އޮކްޓޯބަރު މަހު އިސްރާއީލުން ރައްކާތެރި ސަރަހައްދެއްގެ ގޮތުގައި އިއުލާންކުރި ރަފާހް އަށްވެސް ހަމަލާދެއެވެ.

ގިނަ ފަހަރަށް ހަމަލާތައް އަންނަނީ އިންޒާރެއް ނެތި، އާންމުކޮށް ރޭގަނޑުގެ ވަގުތުގައެވެ.

އަބޫ އަންޒާ ގެއިން މަރުވި 14 މީހުންގެ ތެރެއިން ހަ މީހުންނަކީ ކުޑަކުދިން، ހަތަރު މީހުންނަކީ އަންހެނުން ކަމަށް ހަށިގަނޑުތައް ގެންދިޔަ ހޮސްޕިޓަލުގެ ޑިރެކްޓަރު ޑރ.މަރްވާން އަލްހަމްސް ވިދާޅުވި އެވެ. ފިރިމީހާއާއި ދަރިންގެ އިތުރުން ރާނިޔާއަށް ވަނީ ގާތްތިމާގެ އެހެން މީހުންވެސް ގެއްލިފަ އެވެ.

ގާތްތިމާގެ މީހެއް ކަމަށްވާ ފާރޫގު އަބޫ އަންޒާ ބުނީ އެގޭގައި 35 ވަރަކަށް މީހުން ތިބި ކަމަށާއި އޭގެ ތެރެއިން ބައެއް މީހުންނަކީ އެހެން ސަރަހައްދުތަކުން ގެދޮރު ދޫކޮށް އައިސްފައިވާ މީހުން ކަމަށެވެ. އޭނާ ބުނީ އެ އެންމެންނަކީ ވެސް އާންމުން ކަމަށާއި ގިނައީ ކުޑަކުދިން ކަމަށާއި އެ މީހުންގެ ތެރޭގައި ހަނގުރާމަވެރިއަކު ނެތް ކަމަށެވެ.

އުމުރުން 29 އަހަރުގެ ރާނިޔާ އާއި އޭނާގެ ފިރިމީހާ ވިސާމް ވަނީ ކުއްޖަކު ހޯދުމަށް ދިހަ އަހަރު ހޭދަކޮށްފަ އެވެ. އައިވީއެފްގެ ދެ ބުރު ވެސް ނާކާމިޔާބުވި ނަމަވެސް ތިން ވަނަ ބުރަށް ފަހު އޭނާ ބަނޑުބޮޑުކަން އެނގުނީ މިދިޔަ އަހަރުގެ ކުރީކޮޅު އެވެ. މި ޓްވިންސް އުފަންވީ އޮކްޓޯބަރު މަހުގެ 13 ވަނަ ދުވަހު އެވެ.