ގެއްލިފައިވާ މެލޭޝިއާ އެއާލައިންސްގެ ފްލައިޓް އެމްއެޗް370 ހޯދުމުގެ މަސައްކަތް މެލޭޝިޔާއިން އަލުން ފަށާފާނެ ކަމަށް އެގައުމުގެ ޓްރާންސްޕޯޓް މިނިސްޓަރު އާދީއްތަ ދުވަހު ވިދާޅުވެއްޖެ އެވެ.

އެމްއެޗް370 ދުނިޔޭގެ އެންމެ އުނދަގޫ އެއް އޭވިއޭޝަން މިސްޓަރީއަކަށް ވެގެން ދިޔައީ 2014 ވަނަ އަހަރުގެ މާޗް މަހުގެ 8 ވަނަ ދުވަހު ކުއަލަލަމްޕޫރުން ބެއިޖިންއަށް ދިޔަ މަގުމަތީގައި 239 މީހުންނާއެކު ގެއްލުމުންނެވެ.

10 އަހަރު ފުރުމުގެ ދުވަސްތަކެއް ކުރިން މެލޭޝިއާގެ ޓްރާންސްޕޯޓް މިނިސްޓަރު އެންތޮނީ ލޯކް ވަނީ "މިކަން ހައްލު ކުރުމަށް ކުރެވެން އޮތް ހުރިހާ މަސައްކަތެއް ކުރަން" ވައުދުވެފަ އެވެ.

"މި ހިތާމަވެރި ހާދިސާ ތަކުރާރު ނުވާނެ ގޮތަށް މާނަހުރި ބަދަލުތަކެއް ގެނެވިފައިވީ ނަމަވެސް އެ މަސައްކަތް އަދިވެސް ފުރިހަމަ ކުރަން ޖާގަ އެބައޮތް،" ބޮއިންގް 777 ގެއްލުނު މުނާސަބަތުގައި ބޭއްވި ހަރަކާތެއްގައި ލޯކް ވިދާޅުވި އެވެ.

އެމެރިކާގެ ކަނޑުއަޑީގެ އެކްސްޕްލޯރޭޝަން ކުންފުނި އޯޝަން އިންފިނިޓީން ވަނީ "އިތުބާރު ކުރެވޭ" އާ ސާޗް ޕްރޮޕޯސަލެއް ހުށަހަޅާފައި ކަމަށް ލޯކް ވިދާޅުވި އެވެ.

“ނޯ ފައިންޑް، ނޯ ފީ ޕްރޮޕޯސަލް ހުށަހެޅުމާ މެދު މަޝްވަރާ ކުރުމަށް އޯޝަން އިންފިނިޓީއަށް މެލޭޝިއާއަށް ވަޑައިގަތުމަށް ދައުވަތު ދިނުމަށް އަޅުގަނޑުމެން މިތިބީ ތައްޔާރަށް." ލޯކް ވިދާޅުވި އެވެ.

އޭނާ ވިދާޅުވީ އޯޝަން އިންފިނިޓީއާ އެކު އާ ކޮންޓްރެކްޓަކަށް ކެބިނެޓްގެ ރުހުން ހޯދުމަށް "ކުރެވެން ހުރި ހުރިހާ ކަމެއް" ކުރައްވާނެ ކަމަށެވެ.

"އަޅުގަނޑު އުފާކުރަން، ބައެއް އާ ދިރާސާތަކާއި އާ ޓެކްނޮލޮޖީތަކުގައި ކޮންމެވެސް ވަރެއްގެ ކުރިއެރުމެއް ލިބިފައިވާތީ، އެކަންކަން ބޭނުންކޮށްގެން އަޅުގަނޑުމެން އުންމީދު ކުރަނީ ބޯޓު ހޯދިދާނެ ކަމަށް،" ލޯކް ވިދާޅުވި އެވެ.