އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސް އުޅުނު ދިވެއްސަކު، ހާޓް އެޓޭކެއް ޖެހިގެން ރޭގެ ވަގުތެއްގައި ނިޔާވެއްޖެއެވެ.
މި ހާދިސާގައި ނިޔާވެފައިވަނީ މ. ސައްކެޔޮމާގޭ، އުމުރުން 62 އަހަރުގެ މުހައްމަދު އިމްތިޔާޒެވެ. އޭނާ މައްކާއަށް ދިޔައީ އަލްމަނާސިކް ގުރޫޕުގެ ހަވާލުގައެވެ.
އަލްމަނާސިކް ގުރޫޕުން މައުލޫމާތު ދިން ގޮތުގައި، އިމްތިޔާޒު ނިޔާވީ އޭނާގެ ދެވަނަ އުމްރާގެ އަޅުކަން ފުރިހަމަކުރުމަށްޓަކައި މަސްޖިދުލް ހަރަމްގައި އުޅެނިކޮށް ރޭ ރާއްޖެ ގަޑިން 7:35 ހާއިރުއެވެ. އޭނާ ނިޔާވީ ކުއްލިއަކަށް ދިމާވި ހާޓް އެޓޭކެއްގެ ސަބަބުން ކަމަށް އެ ގުރޫޕުން ބުނެފައިވެއެވެ.
މި ފަހަރުގެ ބޮޑު ޗުއްޓީއާ ދިމާކޮށް ރާއްޖެއިން ގިނަ އަދަދެއްގެ ބަޔަކު އުމްރާގެ އަޅުކަމަށް ގޮސްފައިވެއެވެ. އިސްލާމިކް މިނިސްޓްރީގެ ހިސާބުތަކުން ދައްކާ ގޮތުގައި 7،700 އަށް ވުރެ ގިނަ ދިވެހިން މިހާރު ވެސް އުމްރާގެ އަޅުކަމުގައި ސައުދީ އަރަބިއްޔާގައި އެބަހުއްޓެވެ.
މުހައްމަދު އިމްތިޔާޒު ނިޔާވުމާ ގުޅިގެން، އޭނާގެ އާއިލާއަށް އާންމުން ދަނީ ތައުޒިޔާ ފޮނުވަމުންނެވެ. އޭނާގެ ޖަނާޒާގެ ކަންކަން މައްކާގައި ކުރިއަށްދާނެ ކަމަށް މައުލޫމާތު ލިބެއެވެ.
