މިހާރު އޮތް އިލެކްޝަންސް ކޮމިޝަނަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނުފޫޒު އޮތް، "ރަބަރ ސްޓޭމްޕް" އިދާރާއެއްގެ ގޮތުގައި ޕީއެންއެފްގެ ސެކްރަޓަރީ ޖެނެރަލް މުޙައްމަދު މަލީހް ޖަމާލް ސިފަކުރައްވައިފިއެވެ.

މަލީހް ކުރެއްވި އެކްސް ޕޯސްޓެއްގައި ވިދާޅުވީ، އިލެކްޝަންސް ކޮމިޝަން (އީސީ) އިން ކަންކަން ނިންމަމުން ދަނީ އެއްވެސް މަޝްވަރާއެއް ނެތި، ހަމައެކަނި ވެރިކަން ހިންގާ ޕީއެންސީއަށް މަގުފަހިވާނެ ގޮތަށް ކަމަށެވެ. އަދި ކޮމިޝަންގެ ގަވާއިދުތަކަށް ގެންނަމުންދާ ބަދަލުތަކަކީ ސިޔާސީ ނުފޫޒުން ގެންނަ ބަދަލުތަކެއް ކަމަށް ތުހުމަތުކުރައްވައި، މިހާރު އޮތް ކޮމިޝަނަށް އެއްވެސް އިތުބާރެއް ނެތް ކަމަށް އޭނާ ވިދާޅުވިއެވެ.

ރާއްޖޭގެ އިންތިޚާބީ ނިޒާމުގެ ތާރީޚަށް އަލިއަޅުއްވާލައްވަމުން މަލީހް ވިދާޅުވީ، ރާއްޖޭގައި މިހާތަނަށް އެންމެ އިންސާފުވެރިކޮށް އިލެކްޝަންސް ކޮމިޝަނެއް ހިނގާފައިވަނީ ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމްގެ ވެރިކަމުގެ ފަހުކޮޅުގައި ކަމަށެވެ.

އީސީ އިޞްލާޙު ކުރުމަށް ހުށަހަޅުއްވަމުން މަލީހް ވިދާޅުވީ، އިލެކްޝަންސް ކޮމިޝަންގެ މަޖިލިސް އެކުލެވިގެންވާންޖެހޭނީ ސިޔާސީ ހުރިހާ ޕާޓީތަކެއްގެ މަންދޫބުން ހިމެނޭ ގޮތަށް ކަމަށެވެ. އަދި ކޮމިޝަންގެ ރައީސަކު ހޮވަންވާނީ އެ މެންބަރުންގެ މެދުގައި ނެގޭ ސިއްރު ވޯޓަކުން ކަމަށްވެސް އޭނާ ވިދާޅުވިއެވެ.

މަލީހް މިފަދަ ބަހުގެ ހަމަލާތަކެއް ސަރުކާރަށާއި އީސީއަށް އަމާޒުކުރައްވާފައި މިވަނީ، ގާނޫނު އަސާސީއަށް އިސްލާހް ގެނައުމަށް މިއަދަށް ޖަލްސާއެއް ތާވަލުކޮށް ކުރިއަށް ދިޔުމާއި ގުޅިގެންނެވެ.