އެމެރިކާއިން އެހެން ގައުމުތަކުގެ ދާޚިލީ ކަންކަމާ ބެހި، ނުފޫޒު ފޯރުވަމުންދާ ދިއުމުގެ ތެރެއިން، ވެނެޒުއެލާގެ ތެޔޮ ވިއްކުން "މުއްދަތެއް ނެތް ގޮތަށް" ކޮންޓްރޯލްކޮށް، އެ ގައުމުގެ މުއްސަނދިކަމަށް އަތްގަދަކުރާނެ ކަމަށް އެމެރިކާއިން ބުނެފިއެވެ.
މި ނިންމުމާއެކު، ވެނެޒުއެލާއިން ބޭރުކުރާ ތެލުން ލިބޭ ފައިސާ ބޭނުންކުރާނެ ގޮތް ނިންމުމުގެ ބާރުވެސް އެމެރިކާގެ ސަރުކާރުން ވަނީ އަމިއްލައަށް ނަގާފައެވެ. މިއީ މިނިވަން ދައުލަތެއްގެ އިގްތިސާދީ މިނިވަންކަމަށް އަރައިގަނެ، އެ ގައުމުގެ ރައްޔިތުން އިތުރު ދަތިތަކަކަށް ހުށަހެޅުމަށް އެމެރިކާއިން ހިންގާ އިސްތިއުމާރީ އަމަލެއްގެ ގޮތުގައި ގިނަ ބަޔަކު ސިފަކުރެއެވެ.
ދުނިޔޭގެ ބާރުވެރިކަން ދެއްކުމަށް އެމެރިކާއިން ކުރަމުންދާ މިފަދަ ކަންކަމުގެ ސަބަބުން ވެނެޒުއެލާގެ އިގްތިސާދު އިތުރަށް ބަލިކަށިވެ، އާންމު ރައްޔިތުންނަށް އަސާސީ ހިދުމަތްތައް ހޯދުމަށް ބޮޑެތި ހުރަސްތަކެއް ކުރިމަތިވާނެއެވެ. މީގެ ކުރިންވެސް ސަހްޔޫނީން ފަލަސްތީނުގެ ކުށެއްނެތް ރައްޔިތުންނަށް ދެމުންދާ އަނިޔާވެރި ހަމަލާތަކަށް ފާޅުގައި ވާގިވެރިވާ އެމެރިކާއިން، މިފަހަރު ވެނެޒުއެލާގެ މުއްސަނދިކަމަށް އަތްގަދަކުރުމަކީ ބައިނަލްއަގުވާމީ މިންގަނޑުތަކާ ޚިލާފު، އިންސާފުން އެއްކިބާވެފައިވާ ނިންމުމެކެވެ.
އެމެރިކާގެ މި ނިންމުމުގެ ސަބަބުން ބައިނަލްއަގުވާމީ ބާޒާރުގައި ތެލުގެ އަގަށްވެސް ނޭދެވޭ އަސަރުތަކެއް ކުރާނެ ކަމަށް ބެލެވެއެވެ. މިކަމަކީ ހަމައެކަނި ވެނެޒުއެލާއަށް ދެވޭ ނިކަމެތިކަމެއް ނޫން ކަމަށާއި، މިއީ މުޅި ދުނިޔޭގެ އިގްތިސާދީ ނިޒާމަށް އެމެރިކާއިން ފޯރުވަމުންދާ ނޭދެވޭ ނުފޫޒުގެ ހެއްކެއް ކަމަށް ސިޔާސީ މުހައްލިލުން ބުނެއެވެ.
