ސްރީލަންކާ ކައިރީގައި އޮތް އީރާންގެ އިތުރު އަސްކަރީ އުޅަނދަކަށް އެހީވުމުގެ މަސައްކަތް ލަންކާ އިން ފަށައިފިއެވެ.
ލަންކާ ސަރުކާރު ކެބިނެޓުގެ ތަރުޖަމާނު ނަލިންދަ ޖަޔަތިސަ ވިދާޅުވީ ލަންކާގެ އިގްތިސާދީ ސަރަހައްދުގައި އޮތް އީރާންގެ އަސްކަރީ އުޅަނދަކުން "ޑިސްޓްރެސް" ކޯލެއް، ނޫނީ އެހީއަށް އެދުމާ ގުޅިގެން އެ އުޅަނދަށް އެހީތެރިވުމުގެ މަސައްކަތް ލަންކާ އިން ކުރަމުން އަންނަ ކަމަށެވެ.
އެ އުޅަނދުން 100 އަށް ވުރެ ގިނަ މީހުން ދަތުރު ކުރަމުން އަންނަ ކަމަށް ރިޕޯޓުތައް ބުނެއެވެ.
އިންޑިއާ ކަނޑުގައި ދަތުރުކުރަމުން ދިޔަ އީރާނުގެ ހަނގުރާމަމަތީ މަނަވަރަކަށް އެމެރިކާގެ ސަބްމެރީނަކުން ހަމަލާދީ ފައްތާލައި މަނަވަރުގައި ތިބި 87 ސިފައިން ވަނީ މަރާލައިފައެވެ. މި ހަމަލާ އަމާޒުވެފައިވަނީ އިންޑިއާގައި ބޭއްވި "މިލާން 2026" ކަނޑުގެ އަސްކަރީ ތަމްރީނުތައް ނިންމާލުމަށްފަހު އެނބުރި ގައުމަށް ދަތުރުކުރި އީރާނުގެ "އައިއާރްއައިއެސް ދޭނާ" ނަމަކަށް ކިޔާ މަނަވަރަށެވެ. މި މަނަވަރަކީ މައުޖް ކްލާހުގެ ފްރިގޭޓެކެވެ.
ސްރީލަންކާގެ ކަނޑުގެ ސިފައިންނާ ހަވާލާދީ ލިބޭ މައުލޫމާތުތަކަށް ބަލާއިރު، މިހާތަނަށް 87 މީހެއްގެ ހަށިގަނޑު ވަނީ ފެނިފައެވެ. އަދި 32 މީހަކު ސަލާމަތްކުރެވިފައިވާއިރު، އިތުރު 61 ފަޅުވެރިއަކު އަދިވެސް ފެނިފައެއް ނުވެއެވެ. މި ހާދިސާ ހިނގާފައިވަނީ ސްރީލަންކާގެ އައްސޭރިފަށާ ދުރު ނޫން ސަރަހައްދެއްގައެވެ.
