މިފަހަކަށް އައިސް އުމްރާ ގުރޫޕުތަކުގެ އެތައް މައްސަލައެއް ފެންމަތިވަމުންދާއިރު އެ މައްސަލަތަކުގެ ފަހަތުގައި އޮތް އެންމެ ބޮޑު މައްސަލައަކީ ކަޅު ބާޒާރުގައި ޑޮަރު ގަންނަން ޖެހުން ކަމަށް ކުރީގެ އިސްލާމިކު މިނިސްޓަރު ޑރ އަހުމަދު ޒިޔާދު ބާގިރު ވިދާޅުވެއްޖެއެވެ.
ސިޔާސީ މައިދާނާ ނުހަނު ދުރުގައި މިހާރު އުޅުއްވަމުން ގެންދަވާ ޑރ ޒިޔާދު މިފަދައިން ވިދާޅުވެފައިވަނީ އުމްރާ ގުރޫޕަކުން، މިދިޔަ އަންގާރަ ދުވަހުން ފެށިގެން މިމަހުގެ 26ވަނަ ދުވަހުގެ ނިޔަލަށް ކުރުމަށް ހަމަޖައްސާފައިވާ ޢުމްރާ ދަތުރަށް ޢުމްރާވެރިން ފުރުމަށް އެންމެ ފަހުގެ ތައްޔާރީތައް ވަމުން ދަނިކޮށް، ދަތުރު ކެންސަލް ކޮށްފައިވާ ދަނޑިވަޅެއްގައި ސޯޝަލް މީޑިޔާއަށް ދޫކުރެއްވި ޕޯސްޓެއްގައެވެ.
ޑރ ޒިޔާދުގެ އެ ޕޯސްޓުގައި ވަނީ، ގްރޫޕްތަކަށް ކުރިން އުމުރާގެ ހުއްދަ ދިނުމުގައި އެމީހުންގެ މާލީ ތަނަވަސްކަމަށާއި، އެކަން ޔަގީންކުރުމަށްޓަކައި ބޭންކު ގެރެންޓީއެއް ބަހައްޓަން ޖެހޭ ގޮތަށް އޮތް އޮތުން މިހާރު އުވާލާފައި އޮތުމަކީ އެފަދަ ކަންކަން ދިމާވާ އެއް ސަބަބުކަމަށް ވިދާޅުވެފައެވެ. އަނެއް ސަބަބެއްގެ ގޮތުގައި ޑރ ޒިޔާދު ފާހަގަކުރައްވާފައިވަނީ، ކުރިން ގުރޫޕްތަކުން ސަޢޫދީއަށް ފޮނުވަންޖެހޭ ޓީޓީ ހެދުމުގައި ދިވެހި ބޭންކުތަކުން ބޭންކު ރޭޓަށް ގުރޫޕްތަކަށް ފައިސާ ދޫކުރަމުން ދިޔަ ނަމަވެސް މިހާރު އެކަންވެސް ހުއްޓާލާފައި އޮތުމުން، ގުރޫޕްތަކުން ބޮޑު އަގުގައި ކަޅު ބާޒާރުން ޑޮލަރު ގަންނަން ޖެހި،. އޭގެ ސަބަބުން ގުރޫޕްތަކަށް މާލީ ގެއްލުންތަކެއް ލިބެމުން ދިއުމެވެ. އެއީ ދުވަހަކުވެސް މީގެ ކުރިން ދިވެހި ޢުމްރާ ގުރޫޕް ތަކަށް ދިމާވި މައްސަލައެއް ނޫން ކަމަށްވެސް ޑި ޒިޔާދު ވިދާޅުވެފައިވެއެވެ.
ހަމައެހެންމެ، މި ރަމަޟާން މަހު ޢުމްރާއަށް ދިޔަ ހަތަރު ގުރޫޕަކުން، ރާއްޖެއިން ގެންދިޔަ ހުރީހާ ކާބޯތަކެތި ސަޢޫދީއަށް އެތެރެ ނުކުރެވި އުކާލަންޖެހިފައިވާ ކަމަށް އޭނާ ވިދާޅުވިއެވެ. އަދި މީގެ ކުރިންވެސް މިކަން އެހެން ގުރޫޕްތަކަށް ދިމާވެފައިވާކަން ވެސް ޑރ ޒިޔާދު ފާހަގަކުރައްވާފައިވެއެވެ.
މިދިޔަ ޑިސެމްބަރުގައި ދިވެހި ޢުމްރާވެރިޔަކު ޖިއްދާ އެއާޕޯޓުގައި ތާށިވެ އެތަށް ގަޑިއިރެއް ފަހުން އެ ގުރޫޕް މީހުންގެ ފަރާތުން ވާހަކަ ދައްކައިގެން އޭނަ ނެރެވުނު ކަމަށް ޒިޔާދު ވިދާޅުވިއެވެ. ސަބަބަކީ ޕާސްޕޯޓުގައިވާ ފޮޓޯއާއި، މީހާގެ މިހާރުގެ އަސްލު ސޫރަ ދިމާނުވުން ކަމަށް އޭނާ ވިދާޅުވިއެވެ.
ޒިޔާދު ވިދާޅުވީ މިފަދަ ކަންކަމަކީ ކުރިންވެސް ދިމާވާ ކަންކަން ކަމަށާއި، އެހެންނަވެސް އޭރުގެ ދިވެހި ސަރުކާރުގެ އިންތިޒާމުތައް ރަގަޅުކަމަށެވެ. ދިވެހި އެންބަސީ ސަޢޫދީގަ ހުޅުވި ދުވަހުން ފެށިގެން މިފަދަ ކަންކަމަށް ވަރަށް އެހީތެރިކަން ލިބެމުންދިޔަ ކަމަށާއި ޢުމާރާވެރިންގެ އިސްތިގުބާލުގައި ދިވެހި މިޝަންގެ ބޭފުޅުން އަބަދުވެސް އެއާޕޯޓްގައި ތިއްބަވާ ކަމަށް އޭނާ ވިދާޅުވިއެވެ. އަދި އެފަދަ ކަންކަމަށްވުރެ ވުރެ މާ އުނދަގޫ މައްސަލަތައް ހައްލުކޮށްފައިވާކަމަށް ކަމަށް އޭނާ ވިދާޅުވިއެވެ.
ޒިޔާދު އިތުރަށް ވިދާޅުވީ ސަޢޫދީ ސަރުކާރުގެ ފަރާތުން ދިވެހި އުމްރާވެރިންނަށް ޚާއްސަ އެހީތެެރިކަމެއް ދެއެވެ. އަދި މިހާރާ ޚިލާފަށް ކުރިން ދިވެހި އެންބަސީގައި ތިއްބަވަނީ ދެތިން މުވައްޒަފުން ނަމަވެސް އިންތިޒާމުތައް ހަމަޖައްސާފައިވާ ގޮތް ވަރަށް ރަނގަޅު ކަމަށް އޭނާ ވިދާޅުވިއެވެ. ނަމަވެސް މިހާރު ސައުދީ އެންބަސީގައި ވެސް އެތައް މުވައްޒަފުންނެއް ތިބޭ ކަމަށް އޭނާ ވިދާޅުވިއެވެ.
