މި މަހުގެ ފަހުކޮޅު "މަޢުރިފާ" ގެ ނަމުގައި އިސްލާމި ފޮތް މަޢުރަޒެއް ބޭއްވުމަށް އިސްލާމީ ކަންތައްތަކާ ބެހޭ ވުޒާރާއިން ނިންމައިފިއެވެ.

'ފޮތްތެރިކަން – ބުއްދީގެ ކާނާ' މި މަޢުޟޫއުއަށް ބާއްވާ މި މަޢުރަޒު ބޭއްވުމުގެ މައިގަނޑު މަޤްސަދަކީ ފޮތް ކިޔުމުގެ ސަގާފަތް ތަރައްގީކޮށްް، ފޮތް އުފައްދާ ފަރާތްތަކާއި ފޮތްވިއްކާ ފަރާތްތަކަށް އެ ފަރާތްތަކުގެ ފޮތްތައް ވިއްކުމުގެ ފުރުސަތު ހޯދައިދިނުމާއި ފޮތް ގަންނަން ބޭނުންވާ ފަރާތްތަކަށް އަގުހެޔޮކޮށް ފޮތް ގަތުމުގެ ފުރުސަތު ހޯދައިދިނުމެވެ.

މި މަޢުރަޒު ބޭއްވުމަށް ހަމަޖެހިފައިވަނީ މި މަހުގެ 26 ވަނަ ދުވަހުން ފެށިގެން 28 ވަނަ ދުވަހުގެ ނިޔަލަށް، ކޮންމެ ދުވަހެއްގެ ހަވީރު 4:00 އިން 6:00 އަށް އަދި ރޭގަނޑު 8:00 އިން 10:00 އަށް އިސްލާމީ މަރުކަޒުގެ ޖަލްސާކުރާ މާލަމުގައެވެ.

މި މަޢުރަޒުން ޖުމުލަ 15 ފަރާތަކަށް ޖާގަ ދިނުމަށް ވަނީ ހަމަޖެހިފައެވެ. ޖާގަ ދޫކުރުމަށް ހަމަޖެހިފައިވަނީ ބައިވެރިވާން އެދި އެންމެ ފުރަތަމަ ކުރިމަތިލާ 15 ފަރާތަށެވެ.

މިފަދަ މަޢުރަޒުތަކުގެ ސަބަބުން ދީނީ ފޮތްތަކަށް އޮންނަ ލޯބި އިތުރުވެ، އިސްލާމީ މުޖުތަމައެއް ބުނާކުރުމަށް މަގުފަހިވާނެކަމަށް ލަފާކުރެވެއެވެ.