ގިނަ ބަދަލު ތަކަކާއިއެކު އިސްލާމިކް މިނިސްޓްރީގެ އާ ވެބްސައިޓް، ޖުލައި މަހުގެ 26 ވަނަ ދުވަހު އިފްތިތާހު ކުރަން ހަމަ ޖެހިއްޖެއެވެ.

އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ އަލަށް ހުޅުވޭ މި ވެބްސައިޓް ވެގެންދާނީ އާންމު ރައްޔިތުންނަށް ފަސޭހަކަމާއިއެކު ހިދުމަތް ލިބިގަނެވޭނެ ވެބްސައިޓަކަށެވެ. އެގޮތުން އަލަށް ފަރުމާކުރެވިފައިވާ މި ވެބްސައިޓްގައި ލައިބްރަރީއެއް ހުންނާނެކަމަށާއި، މި ލައިބްރަރީއިން އެކި ފޮތްތައް ޑައުންލޯޑުކޮށްގެން ބޭނުން ކުރެވޭނެކަމަށްވެސް ޑރ. ޝަހީމް ވިދާޅުވިއެވެ.

މީގެ އިތުރުން 2008ން ފެށިގެން ވުޒާރާއިން ނެރެފައިވާ ހުރިހާ ރެފަރެންސް ފޮތްތައް ލިބެން ހުންނާނެކަމަށްވެސް ވަޒީރު ފާހަގަ ކުރެއްވިއެވެ. އަދި ކީރިތި ރަސޫލާ ޟޢވ، ގެ ސިޔަރަތު ދިވެހި ބަހުން ވީޑިއޯ ރިޕޯޓްތަކުގެ ސިފައިގައި ބަލައި އަޑުއަހާލުމުގެ ފުރުސަތު މި ވެބްސައިޓުން ލިބިގެންދާނެއެވެ.

ވުޒާރާއިން ތައްޔާރު ކުރި ރިސާލަތު ޕްރޮގުރާމްގެ ހުރިހައި މައުޟޫއެއް ދިވެހި އަދި އިނގިރޭސި ބަހުން މި ވެބްސައިޓުން ފެންނަން ހުންނާނެއެވެ. އަދި މި ވުޒާރާގެ އިދާރީ ހުރިހާ މައުލޫމާތެއް އުޞޫލުތަކާއި ފޯމްތައްވެސް މި ވެބްސައިޓުން ލިބޭނެކަމަށް ވަޒީރު ޑރ. މުހައްމަދު ޝަހީމް ފާހަގަކުރެއްވިއެވެ.