މިފްކޯގެ ސީއީއޯ އަހުމަދު ޝަމާހުއަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން އިންޒާރުދިން ޚަބަރު ކަވަރ ކުރި ނޫސްވެރިޔާއަށް ޝަމާހުގެ އަނބިމީހާ، ރައީސް މުހައްމަދު މުއިއްޒު ސަރުކާރުގައި ހުރި އެންމެ ނާގާބިލު ޑެޕިއުޓީ މިނިސްޓަރު އަމާނީ މުހައްމަދު އިންޒާރުދީފިއެވެ.

ހޯމްލޭންޑް އެންޑް ސެކުއިރިޓީގެ ޑެޕިއުޓީ މިނިސްޓަރަކަށް ހުރި އަމާނީ އިންޒާރުދީ، ހަޑި ހުތުރު ބަހުން މުއާމަލާތް ކޮށްފައިވަނީ ޕީސީބީއިން ޝަމާހުއަށް ފޮނުވި ސިޓީގެ ޚަބަރު ކަވަރ ކުރި ޗެނަލް13ގެ ނިއުސް އެންޑް ކަރަންޓް އެފެއާޒުގެ ހެޑް މަރިޔަމް އިސްއާދާ އިސްމާއިލަށެވެ.

އަމާނީ ވަނީ މަރީއަށް ހޯމަ ދުވަހުގެ ރޭގެ ދަންވަރުން ފެށީގެން މެސެޖު ކުރަން ފަށަފައެވެ. ވަޓްސް އަޕް މެދުވެރިކޮށް ފޮނުވި މެސެޖުތަކުގައި އޭނާގެ ފިރިމީހާއާ މަރީ ޖައްސާލައިގެން އުޅޭ ކަމަށާ މަރީއަކީ އޭނަގެ ފިރިމީހާއާ އަރާ އަރަފޯދިގެން ނުވާ މީހެއް ކަމަށް ބުނެފައިވެއެވެ.

މީގެ އިތުރުން އަމާނީ ބުނެފައިވާ ގޮތުގައި ޕީސީބީގައި ތިބީ އެމްޑީޕީ މީހުންނެވެ. ނަމަވެސް ޗެނަލް13 އިން މައުލޫމާތު ސާފުކުރިއިރު އަމާނީގެ ފިރިމީހާ، މިފްކޯގެ ސީއީއޯ ޝަމާހުއަށް ފޮނުވި ސިޓީގައި ސޮއިކޮށްފައިވާ ހަމްދީ އަގީލުއަކީވެސް މި ސަރުކާރުން އައްޔަންކޮށްފައިވާ ބޭފުޅެކެވެ.

އަމާނީ ވަނީ މިކަމާ ގުޅުވާ މަރީގެ ޒާތީ ދިރިއުޅުމާ އަދި ދަރިންނާ ވެސް މިކަމާ ޖާމިނުކޮށް އޭނާގެ އަމިއްލަ ދިރިއުޅުމާ ބެހިފައެވެ.

މީގެ އިތުރުން އަމާނީގެ ފިރިމީހާއަށް އެކަން ހުއްޓުވުމަށް އެދި މަރި ގުޅުމުން ޝަމާހުވަނީ، ރައީސް ޔާމީންއާ ބެހޭ ގޮތުން ސުޕްރީމު ކޯޓުން ކޮށްފައި ހުރި ހުކުމްތައް ކަލޭމެން ނުލިޔަނީ ކީއްވެހޭ ކިޔާ ޗެނަލް13ގެ ޚަބަރު ގެންނަންވީ ގޮތް ކިޔައިދީފައެވެ.

ހަމަ އެހެންމެ އަމާނީ ވަނީ މަރީއަކީ ތަންދޮރު ނުދަންނަ ޖާހިލެއް ކަމަށް ބުނެ ސަރުކާރުގެ ވެރިޔަކު މުހާތަބުކުރަންވާނެ އުސޫލަށް ވުރެ އަހުލާގީ ގޮތުންވެސް ދަށު ސަރަޖއަކުން މުއާމަލާތްކޮށްފައެވެ.

ޝަމާހުއަކީ މީގެ ކުރިން އެމްޑީޕީގައި ހުރެ ރައީސް އަބްދުﷲ ޔާމީންއަށާ މެޑަމް ފާތިމަތު އިބްރާހިމަށް ވަރަށް ހަޑި ހުތުރު ބަހުން މުއާމަލާތްވެސް ކޮށްފައިވާ މީހެކެވެ. އަދި މިހާރުު މިފްކޯގެ ސީއީއޯއަކަށް އޭނާ ހަމަޖެއްސީ އޭނާއަކި ރައީސް މުއިއްޒުގެ ކުޑައިރު ބެސްޓު ފްރެންޑްއަށް ވުމުން ކަމަށް ގިނަ ބަޔަކު ބުނެއެވެ.

ތެދު ޚަބަރެއް ގެނެސްދީގެން މަރީއަށް އިންޒާރު އަމާނީ ދީފައިވާއިރު ސަރުކާރުގެ މުއައްސަސާތަކުން މިކަމާ މެދު އަދި އެއްވެސް ފިޔަވަޅެއް އަޅާފައިނުވެއެވެ. މިކަމާ ގުޅިގެން މަރީ ވިދާޅުވެފައިވަނި އެއީ ސަރުކާރުގެ ހުރިހާ މުއައްސަސާތައް ގުޅިގެން ވަކި ވަކި ނޫސްވެރިންގެ ޒިންމާއަށް ހުރަސްއަޅުވަން ހިންގަމުންދާ ޖަރީމާއެއް ކަމަށް ތުހުމަތު ކުރެވޭ ކަމަށެވެ.

މަރީ ވިދާޅުވި ގޮތުގައި އެހެން ދޭ އިންޒާރަކުން ފުރިފައި ހުރި އެއްޗެއް ގުޑު ގުޑެއް ނާޅާނެ ކަމަށާ އޭނާގެ ނަފްސްވެސް ނުވިކޭނެ ކަމަށެވެ.