ސަރުކާރު ކުންފުނިތަކުގެ މުވައްޒަފުންގެ އަދަދު 33 އިންސައްތަ މަދުކުރުމަށް އަންގައިފިއެވެ.
މުވައްޒަފުންގެ އަދަދު މަދު ކުރުމަށް އެންގީ، ފިނޭންސް އެންޑް ޕަބްލިކް އެންޓަޕްރައިޒަސް މިނިސްޓްރީން، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އަށެވެ.
މައުލޫމާތު ލިބިފައިވާ ގޮތުގައި، މިގޮތަށް ފިނޭންސުން ޕިސީބިއަށް އަންގާފައިވަނީ، މިނިސްޓަރު މޫސާ ޒަމީރު، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ރައީސް މުހައްމަދު އަނަސްއަށް ފޮނުއްވި ރަސްމީ ސިޓީއެއްގައެވެ.
މިނިސްޓަރު ޒަމީރުގެ ސިޓީގައިވާ ގޮތުން ކުންފުނިތަކުގެ އިންސާނީ ވަސީލަތްތައް މެނޭޖްކުރުން ހަރުދަނާކޮށް، މާލީ ގޮތުން ދެމެހެއްޓެނިވި ގޮތެއްގައި ކުންފުނިތައް ހިންގުމަށް ވަނީ ބާރުއަޅުއްވާފައެވެ.
ވަޒީފާއަށް މީހުން އައްޔަންކުރުމުގައި ތައުލީމީ ފެންވަރާއި ހުނަރަށް ބަލައިގެން މީހުން ހޮވާ "މެރިޓް ބޭސްޑް" އުސޫލު މިހާރަށްވުރެ ހަރުދަނާކުރުމަށް ވެސް މިނިސްޓަރު ވަނީ ޕީސީބީގައި އެދިވަޑައިގެންފައެވެ. މިއީ އެންމެ ގާބިލު ފަރާތްތައް ވަޒީފާއަށް ހޮވައި، ކުންފުނިތަކުގެ މަސައްކަތްތައް އެންމެ ފުރިހަމަ ގޮތުގައި ކުރިއަށް ގެންދިއުމަށް މަގުފަހިކުރުމަށް ނިންމި ނިންމުމެއް ކަމަށް ފިނޭންސް މިނިސްޓްރީން ފާހަގަކުރެއެވެ.
މި ނިންމުމަކީ ކުންފުނިތަކުގެ ހިންގުމުގެ ޚަރަދުތައް ކުޑަކުރުމަށާއި، ދައުލަތުގެ ފައިސާ ހަރުދަނާ އުސޫލެއްގެ ދަށުން ބެލެހެއްޓުމަށްޓަކައި އެޅި ފިޔަވަޅެއް ކަމަށް އެ މިނިސްޓްރީން ބުނެއެވެ. މިނިސްޓްރީން މީޑިއާއާ ހިއްސާކުރި މައުލޫމާތުގައިވާ ގޮތުން، މިއީ ޕީސީބީން މީގެ ކުރިން ނެރެފައިވާ އިރުޝާދުތަކަށް އިތުރުކުރެވުނު މުހިންމު ފިޔަވަޅެކެވެ.
މީގެ ކުރިން އަޅާފައިވާ ފިޔަވަޅުތަކުގެ ތެރޭގައި މުސާރައާއި އިނާޔަތްތައް ކޮންޓްރޯލްކުރުމާއި، ކޮންމެހެން ބޭނުންވާ ހާލަތްތަކުގައި ފިޔަވައި މަގާމުގެ ކުރިއެރުން ދިނުމާއި އައު މުވައްޒަފުން ނެގުން ހުއްޓާލުން ހިމެނެއެވެ. އަދި އިތުރުގަޑީގެ މަސައްކަތް ހަނިކުރުމާއި، ކޮންމެހެން ބާއްވަން ނުޖެހޭ ހަރަކާތްތަކާއި ދަތުރުފަތުރުގެ ޚަރަދުތައް ކުޑަކުރުން ވެސް ހިމެނެއެވެ.
