ގުދުސްއަށް ވެރިވެގެންފައިވާ ހައްދުފަހަނައެޅި އިސްރާއީލުން އަންގާރަ ދުވަހު އިއުލާން ކުރި ގޮތުގައި މުސްލިމުންގެ އެންމެ މުގައްދަސް ތިންވަނަ މިސްކިތް ކަމަށްވާ މަސްޖިދުލް އަޤްޞާއަށް ނަމާދު ކުރުމަށް ގުދުސްއަށް ވަނުމުގެ ހުއްދަ ލިބޭނީ ހަމައެކަނި ހުޅަނގު އައްސޭރީގެ ފަލަސްތީނުގެ ކުޑަކުދިންނާއި އުމުރުން ދުވަސްވީ މީހުން ކަމަށެވެ.

ހޯމަ ދުވަހު އިއުލާންކުރި ގަވާއިދުގެ ދަށުން ހުޅަނގު އައްސޭރީގެ ފަލަސްތީނުގެ ރައްޔިތުން ހުކުރު ނަމާދު ކުރުމަށް ކޮމްޕައުންޑަށް ވަނުން ވަދެވޭނީ 55 އަހަރުން މަތީގެ ފިރިހެނުންނާއި 50 އަހަރުން މަތީގެ އަންހެނުންނާއި 10 އަހަރުން ދަށުގެ ކުދިންނަށް ކަމަށް ކޮގަޓްގެ ވެރިޔާ ޣައްސާން އެލިއަން ފޭސްބުކްގައި އަރަބި ބަހުން ކުރި ޕޯސްޓެއްގައި ބުނެފި އެވެ.

އަޅުކަންކުރާ މީހުންނަށް ކޮގަޓްގެ ސައްހަ ހުއްދައެއް ބޭނުންވާނެ، ސެކިއުރިޓީ އެޕްރޫވަލް އަށް ރިއާޔަތްކޮށް، ހާލަތާއި އެހެނިހެން ކަންކަމުގެ އެސެސްމަންޓްތަކަށް ބަދަލުތަކެއް އަތުވެދާނެ އެވެ.

ހުޅަނގު އައްސޭރީގެ ފަލަސްތީނުގެ ރައްޔިތުންނަށް ރޯދަމަހު އާދީއްތަ ދުވަހާއި ބުރާސްފަތި ދުވަހާއި ދެމެދު ގުދުސްއަށް ޒިޔާރަތް ކުރެވޭތޯ ކޮގަޓް އިން ބުނެފައެއް ނުވެއެވެ.

ކުރީ އަހަރުތަކާ ހިލާފަށް ހަނގުރާމައިގެ ސަބަބުން ޣައްޒާގެ ފަލަސްތީނުގެ ރައްޔިތުންނަށް އަލްއަޤްސާ މިސްކިތުގައި ނަމާދު ކުރުމުގެ ހުއްދައެއް ނުދޭން ޔަހޫދީން ވަނީ ނިންމާފައެވެ.