އެމެރިކާގެ ރައީސް ޑޮނަލްޑް ޓްރަމްޕް، އީރާނާއެކު އުފެއްދުންތެރި މަޝްވަރާތަކެއް ކުރިއަށްގޮސްފައިވާ ކަމަށް ވިދާޅުވެ، އީރާނުގެ ހަކަތައާ ބެހޭ އިންފްރާސްޓްރަކްޗާއަށް އެއްވެސް ހަމަލާއެއް ނުދިނުމަށް އެމެރިކާގެ އަސްކަރިއްޔާއަށް އަމުރުކުރައްވައިފިއެވެ.
ޓްރަމްޕް މި ނިންމެވުން ނިންމެވީ ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ކުޑަކުރުމުގެ ނަމުގައެވެ. ނަމަވެސް، ބައިނަލްއަގުވާމީ ސިޔާސީ މުހައްލިލުން މިކަން ސިފަކުރަނީ މިއީ މެދުއިރުމަތީގެ މަސްރަހުގައި އެމެރިކާއަށް ގޮތްހުސްވުމުން، އެންމެ ފަހު ވަގުތު މަޝްވަރާގެ މަގު އިޚްތިޔާރުކުރާކަން ދެއްކުމަށް ޓްރަމްޕް ކުރައްވާ ސިޔާސީ އުކުޅެއްގެ ގޮތުގައެވެ.
އީރާނުގެ މުހިންމު ވަސީލަތްތަކަށް، ހާއްސަކޮށް ހަކަތައާ ބެހޭ މަރުކަޒުތަކަށް ހަމަލާދިނުން ފަސްކުރުމަށް އަމުރުކުރެއްވުމަކީ، އަސްކަރީ ގޮތުންނާއި އިގްތިސާދީ ގޮތުން އީރާނު ކަކޫޖެއްސުމަށް އެމެރިކާއިން ކުރި މަސައްކަތްތައް ނާކާމިޔާބުވަމުންދާކަމުގެ ހެއްކެއް ކަމަށް ގިނަ ބަޔަކު ދެކެއެވެ. ޒަމާނުއްސުރެ އީރާނާ ދެކޮޅަށް ހަރުކަށި ސިޔާސަތުތަކެއް ގެންގުޅުނު އެމެރިކާއިން ކުއްލިއަކަށް މަޝްވަރާގެ މޭޒަށް ދިއުމަށް ޝައުގުވެރިކަން ފާޅުކުރުމަކީ، އެމެރިކާގެ ބާރު މެދުއިރުމަތީގައި ކުޑަވަމުންދާކަން ދޭހަކޮށްދޭ ކަމެކެވެ.
ޓްރަމްޕް ވިދާޅުވި ގޮތުގައި އީރާނާއެކު ކުރެވުނު މަޝްވަރާތަކަކީ ވަރަށް "އުފެއްދުންތެރި" ވާހަކަތަކެކެވެ. ނަމަވެސް މި މަޝްވަރާތަކުގެ ތަފްސީލެއް ހާމަކޮށްފައެއް ނުވެއެވެ. މީގެ ކުރިން އީރާނަށް އަސްކަރީ ބޮޑެތި ހަމަލާތަކެއް ދޭނެ ކަމުގެ އިންޒާރު ދެމުންދިޔަ ޓްރަމްޕްގެ ރާގު މިހާ ބޮޑަށް ބަދަލުވުމުން، މިއީ އެމެރިކާއިން އީރާނުގެ ކުރިމަތީގައި އިތުރު ގޮތްތަކެއް ނެތިގެން ކުރި ކަމެއްގެ ގޮތުގައި ވަނީ ބެލެވިފައެވެ.
މި ނިންމެވުމާއެކު، އެމެރިކާގެ އަސްކަރީ ސްޓްރެޓެޖީއަށް ބޮޑެތި ބަދަލުތަކެއް އަންނާނެ ކަމަށް ބެލެވޭއިރު، މިއީ އީރާނަށް ލިބުނު ކާމިޔާބީއެއްގެ ގޮތުގައިވެސް މަސްރަހު ދިރާސާކުރާ ފަރާތްތަކުން ބުނެއެވެ. އެމެރިކާގެ މި އަމަލަކީ ދުނިޔޭގެ ކުރިމަތީގައި އެމެރިކާގެ ބާރުވެރިކަން ދެއްކުމަށް ކުރާ މަސައްކަތް ފެއިލްވެ، އެންމެ ފަހުން އީރާނުގެ ޝަރުތުތަކަށް ދޫދޭން ޖެހުން ކަމަށްވެސް ބައެއް ރިޕޯޓުތައް ބުނެއެވެ.
