ބްރެޒިލްގެ އަސްކަރީ އަދި ވައިގެ ސިނާއަތުގައި އާ ތާރީޚެއް ލިޔެވިގެންދާ ފަދަ މުހިންމު ކުރިއެރުމެއް ހޯދައިފިއެވެ. އެ ގައުމުގެ އަމިއްލަ ފަސްގަނޑުގައި އެސެމްބްލްކުރި ފުރަތަމަ "ގްރިޕެން އެފް-39އީ" ސުޕަސޮނިކް ފަޔަރ ޖެޓް މިވަނީ ރަސްމީކޮށް ދައްކާލާފައެވެ.
މިއީ ބްރެޒިލްގެ އަސްކަރީ ގާބިލްކަން އިތުރުކުރުމަށާއި ޓެކްނޮލޮޖީގެ ގޮތުން އަމިއްލަ ފައިމައްޗަށް ތެދުވުމަށް ކުރަމުންދާ މަސައްކަތުގެ ދަށުން، ފާއިތުވި 10 އަހަރު ދުވަހު ކުރި ބުރަ މަސައްކަތާއި ބިލިއަން ޑޮލަރުގެ އިންވެސްޓްމަންޓުން ހާސިލްކުރެވުނު ބޮޑު ކާމިޔާބީއެކެވެ.
މި މަޝްރޫއަކީ ބްރެޒިލް އާއި ސްވިޑެންގެ ދިފާއީ ކުންފުނި "ސާބް" ގުޅިގެން ކުރިއަށްގެންދާ ސްޓްރެޓެޖިކް މަސައްކަތެކެވެ. މީގެ ކުރިން ބްރެޒިލުން ބޭނުންކުރި މި މަރުކާގެ ޖެޓްތަކަކީ ސްވިޑެންގައި އުފައްދާފައިވާ ބޯޓުތަކެއް ނަމަވެސް، މިއީ ބްރެޒިލްގައި މިފަދަ ހަނގުރާމަ މަތިންދާބޯޓެއް އެސެމްބްލްކުރި ފުރަތަމަ ފަހަރެވެ.
ޒަމާނީ ރާޑަރ ސިސްޓަމްތަކާއި، ކުރިއަރާފައިވާ ހަތިޔާރާއި އެވިއޮނިކްސް ހިމެނޭ މި "މަލްޓިރޯލް" ކޮމްބަޓް އެއާކްރާފްޓުގެ ސަބަބުން ބްރެޒިލްގެ ވައިގެ ސިފައިންގެ ފެންވަރު ދުނިޔޭގެ ފެންވަރަށް އުފުލިގެންދާނެއެވެ.
ބްރެޒިލްގެ އޮފިޝަލުން ވިދާޅުވާ ގޮތުގައި، މި މަޝްރޫއުގެ ސަބަބުން އެ ގައުމުގެ އިންޖިނިއަރުންނަށް އާ ތަޖުރިބާތަކެއް ލިބި، ދިފާއީ ސިނާއަތުގެ އަމިއްލަ އުފެއްދުންތެރިކަން އިތުރުވެގެންދާނެއެވެ. މިއީ ހަމައެކަނި އަސްކަރީ ކުރިއެރުމެއް ނޫން ކަމަށާއި، މިއީ ގައުމުގެ ޓެކްނޮލޮޖީގެ މިނިވަންކަމަށް އެޅުނު ވަރުގަދަ ފިޔަވަޅެއްގެ ގޮތުގައި އެ ބޭފުޅުން ސިފަކުރައްވައެވެ.
މި ކާމިޔާބީއާ އެކުވެސް، ބައެއް ތަޖުރިބާކާރުން ފާހަގަކުރާ ގޮތުގައި މި މަތިންދާބޯޓުގެ މުހިންމު ބައެއް ކޮމްޕޯނެންޓްތަކަކީ އަދިވެސް ބޭރު ގައުމުތަކުން ހޯދަންޖެހޭ ތަކެއްޗެވެ. ނަމަވެސް، ބްރެޒިލްގައި މި ބޯޓު އެސެމްބްލް ކުރަން ފެށުމަކީ ދިފާއީ އުފެއްދުންތެރިކަމުގައި އެހެން ގައުމުތަކަށް ބަރޯސާވުން ކުޑަކުރުމަށް އެޅުނު މުހިންމު ބިންގަލެކެވެ.
