އިންޑިއާގެ ކަޝްމީރުގެ ރައްޔިތުން މިއަދު ދުނިޔެއަށް ދައްކައިދިނީ އިންސާނިއްޔަތުކަމުގެ އިންތިހާއެވެ. އީރާނުގެ ރައްޔިތުންނަށް ދިމާވެފައިވާ ދަތި ހާލަތުގައި އެހީތެރިވުމަށް ކަޝްމީރުގެ ކުދިބޮޑު އެންމެން ނުކުމެ، އެމީހުންގެ އަތުގައި ހުރި ހުރިހާ އެއްޗެއް ގުރުބާން ކުރަމުންދާ މަންޒަރަކީ ހިތްތަކަށް އަސަރުކުރުވާ ފަދަ މަންޒަރެކެވެ.
މި އެހީތެރިކަމުގެ ހަރަކާތްތައް މިހާރު ވަނީ ވަރުގަދަ ޖަޒުބާތީ އެއްވުންތަކަކަށް ބަދަލުވެފައެވެ. ފިރިހެނުންނާއި، އަންހެނުންނާއި، ކުޑަކުދިންވެސް ގެންދަނީ އެމީހުންގެ އަތުގައި ހުރި ނަގުދު ފައިސާއާއި، ރަނާއި، ގެންގުޅޭ ސާމާނާއި، އަދި ދިރޭތަކެތިވެސް ހަދިޔާކުރަމުންނެވެ. ބައެއް އަންހެނުން އެމީހުންގެ ކައިވެނީގެ ގަހަނާތައް ހަދިޔާކުރި އިރު، ކުޑަކުދިން ވަނީ އެކުދިން ރައްކާކޮށްފައި ހުރި ފައިސާ ފޮށިތައްވެސް ހުސްކޮށްލާފައެވެ.
ކަޝްމީރުގެ ރައްޔިތުން މި ދެއްކި ނަމޫނާއަކީ މުއްސަނދި އަރަބި ގައުމުތަކާއި، އަދި އަޅުގަނޑުމެންގެ ދިވެހި ސަރުކާރަށްވެސް މިހާތަނަށް ދެއްކިފައި ނުވާ ފަދަ ވަރުގަދަ އިންސާނީ މިސާލެކެވެ. ފިތުރު އީދު ދުވަސްވަރުގެ އުފާފާޅުކުރުންތަކުގެ ބަދަލުގައި، އެމީހުން އިސްކަންދިނީ އެމީހުންނާ އެތައް ހާސް މޭލެއް ދުރުގައި ތިބި އަޚުންނާއި އުޚުތުންނަށް އެހީތެރިވުމަށެވެ.
"މިއީ އަހަރެމެންނަށް ކޮށްދެވޭނެ އެންމެ ކުޑަ މިންވަރު،" އެހީ ހަދިޔާކުރި މީހަކު ބުންޏެވެ.
ރިޕޯޓްތަކުން އެނގޭ ގޮތުގައި މިހާތަނަށް އެތައް ސަތޭކަ ކްރޯޑް ރުފިޔާގެ އެހީ ވަނީ އެއްކުރެވިފައެވެ. ނަމަވެސް، މީގެ އެންމެ މުހިންމު ކަމަކީ ފައިސާގެ އަދަދެއް ނޫނެވެ. އެއީ އެކަކު އަނެކަކަށްޓަކައި ހިތުގައި އޮތް ލޯތްބާއި އެއްބައިވަންތަކަމެވެ. މިއީ ދުނިޔެއަށް ދިން ވަރުގަދަ މެސެޖެކެވެ. ކިތަންމެ ދަތި ހާލުގައި އުޅުނު ނަމަވެސް، އިންސާނިއްޔަތުކަން އަދިވެސް ދިރިހުރިކަމުގެ ހެއްކެކެވެ.
އިންޑިއާ ސަރުކާރުން އެމެރިކާއާ އިޒްރޭލަށް ވާގިވެރިވަމުން ދިޔަ ނަމަވެސް ކަޝްމީރުގެ ރައްޔިތުން މި ދައްކުވައިދެނީ ލާއިންސާނީ އަމަލުތަކާއި ދެކޮޅަށް ތެދުވަން މިހާރުވެސް މާ ލަސްވެއްޖެކަމެވެ.
