ޔޫގަންޑާގެ ހަތިޔާރު އެޅި ސިފައިންގެ ވެރިޔާ، ޖެނެރަލް މުހޫޒީ ކައިނެރުގާބާ ދާދިފަހުން ދެއްކެވި ވާހަކަފުޅުތަކަކާ ގުޅިގެން ބައިނަލްއަގުވާމީ މައިދާނުގައި ބޮޑެތި ފާޑުކިޔުންތަކެއް އަމާޒުވާން ފަށައިފިއެވެ.
މުހޫޒީ ވިދާޅުވި ގޮތުގައި، ޔޫގަންޑާގެ ސިފައިންނަށް އެންމެ ދެ ހަފްތާގެ ތެރޭގައި އީރާނުގެ ވެރިރަށް ތެހެރާން ހިފުމުގެ ގާބިލުކަން އެބަހުރި ކަމަށެވެ. އަދި މި އޮޕަރޭޝަން ކާމިޔާބު ކުރުމަށްޓަކައި އެންމެ ބްރިގޭޑެއްގެ ސިފައިން ވެސް ފުދޭނެ ކަމަށް އޭނާ ވަނީ ވިދާޅުވެފައެވެ.
މި ވާހަކަފުޅުތަކަކީ އެއްވެސް އަސާސެއް ނެތް، އަދި ސަރަހައްދީ ހަމަޖެހުމަށް ބުރޫއަރާފަދަ ނުރައްކާތެރި ވާހަކަތަކެއްގެ ގޮތުގައި ގިނަ ބަޔަކު ސިފަކުރެއެވެ. ޚާއްޞަކޮށް، އީރާނަކީ އަސްކަރީ ގޮތުން ވަރުގަދަ ގައުމަކަށް ވާއިރު، ޔޫގަންޑާ ފަދަ ގައުމެއްގެ އަސްކަރީ އިސްވެރިޔަކު މިފަދަ ގޮތަކަށް ވާހަކަ ދެއްކެވުމަކީ ޚުދުމުޚުތާރު ކަމާއި، ޑިޕްލޮމެޓިކް އުސޫލުތަކާ ޚިލާފު ކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ބުނެއެވެ.
ޔޫގަންޑާގެ ރައީސް ޔޮވެރީ މުސެވެނީގެ ދަރިކަލުން މުހޫޒީއަކީ މީގެ ކުރިންވެސް އަވަށްޓެރި ގައުމުތަކަށް އަރައިގަންނާނެ ކަމުގެ އިންޒާރު ސޯޝަލް މީޑިއާގައި ދެއްވައިގެން ގިނަ ބައެއްގެ ފާޑުކިޔުން އަމާޒުވެފައިވާ ބޭފުޅެކެވެ. މިފަދަ ޒިންމާދާރުކަން ކުޑަ ބަސްތަކުގެ ސަބަބުން ޔޫގަންޑާގެ ޚާރިޖީ ގުޅުންތަކަށް ނޭދެވޭ އަސަރުކޮށް، ދުނިޔޭގެ ކުރިމަތީގައި އެ ގައުމުގެ އަގު ވެއްޓެމުންދާކަން ފާހަގަކުރެވެއެވެ.
