އަމިއްލަ ފައިދާއަށްޓަކައި ސަރުކާރުން ލިބުނު ފަޅުތަކާއި ގިރިތަކުގެ ބޭނުންކޮށްގެން ނުފޫޒު ފޯރުވަން މަސައްކަތްކުރާ މަދު ވިޔަފާރިވެރިންތަކެއް އުޅޭކަމުގެ ތުހުމަތު، މަޝްހޫރު ވިޔަފާރިވެރިޔާ މުހައްމަދު ފިރާގު ކުރައްވައިފިއެވެ.
ހޮނިހިރު ދުވަހު ބޭއްވި ވާދަވެރި ތިން އިންތިޚާބުގެ ނަތީޖާއަށްފަހު މުހައްމަދު ފިރާގު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އާންމުންގެ އިތުބާރު ދުވަހުން ދުވަހަށް ސަރުކާރަށް ދަށްވަމުންދާއިރު، އެކި ނަންނަމުގައި ސަރުކާރުން އާންމުންގެ ފައިސާ ޚަރަދުކުރުން އިތުރުވަމުންދާ ކަމަށެވެ.
ރައްޔިތުން މިކަންކަން ވަރަށް ގާތުން ބަލަމުންދާކަން ފާހަގަކުރައްވައި ފިރާގު ވިދާޅުވެފައިވަނީ، ގިނަ ބަޔަކު ފައިސާކޮޅަކަށް އެމީހުންގެ ވިސްނުން ބަދަލުނުކުރާކަން މި ނަތީޖާތަކުން ހާމަވާކަމަށެވެ.
ފިރާގު ވަނީ އަމިއްލަ ފައިދާއަށްޓަކައި ސަރުކާރުން ލިބުނު ފަޅުތަކާއި ގިރިތަކުގެ ބޭނުންކޮށްގެން ނުފޫޒު ފޯރުވަން މަސައްކަތްކުރާ މަދު ވިޔަފާރިވެރިންތަކެއް އުޅޭ ކަމަށް ތުހުމަތުކޮށްފައެވެ. އެހެންކަމުން، ކުރިއަށް އޮތް ތަނުގައި ރައްޔިތުންގެ އިތުބާރު ހޯދުމަށްޓަކައި، އެފަދަ "ދަހިވެތި" ފަރާތްތައް ސަރުކާރާ ފެއަށް ވެރިން ޖައްސަންޖެހޭ ކަމަށް އޭނާ ވިދާޅުވެފައިވެއެވެ.
ރައްޔިތުންގެ މަޖިލީހުގެ މެމްބަރުން ކަސްތޮޅު އެޅުވުމާ އަދި ކައުންސިލްތަކުގެ ބާރު ގާނޫނު އަސާސީއަށް އިސްލާހު ގެނެސް ސަރުކާރުން ކަނޑުވާލާފައިވާ ވުމަށް އިޝާރާތްކުރައްވާ ފިރާގު ވަނީ، ރައްޔިތުން ހޮއްވަވާފައިވާ މަންދޫބުންގެ ހައްގުތައް އަނބުރާ ލިބި، މިނިވަންކަމާއެކު އިންސާފު ގާއިމުކޮށްދެއްވުމަށް ގޮވާލައްވާފައެވެ.
ޕޯސްޓު ނިންމަވާލައްވަމުން ފިރާގު ވަނީ ރާއްޖެއަކީ ހުރިހާ ދިވެހިންގެ ގައުމެއްގެ ގޮތުގައި ބޭއްވުމަށް ގޮވާލައްވާ، ރައްޔިތުންގެ މުދާތައް ނުފޫޒުން ހޯދާ ފަރާތްތައް އެކަހެރިކޮށް ދިނުމަށްވެސް ކަމާބެހޭ ފަރާތްތަކުގެ ކިބައިން އެދިވަޑައިގެންފައެވެ.
