އިންޑިއާގެ މަނިޕޫރު ސްޓޭޓްގައި ދިރިއުޅޭ ކުކީ ދަރިކޮޅުގެ މީހުން، އެމީހުންގެ ޝަރުއީ މިނިވަންކަމަށް ވަކާލާތު ކުރަމުންދަނިކޮށް، އެ ޑިމާންޑްތައް ފުނޑުފުނޑުކޮށްލުމަށްޓަކައި އިންޑިއާގެ ސަލާމަތީ ބާރުތަކުން އެ ސަރަހައްދުގައި ނަސްލު ނައްތާލުމުގެ އަނިޔާވެރި އަމަލުތަކެއް ހިންގަން ފަށައިފިއެވެ. މި ހަމަލާތަކުގައި މައުސޫމް ރައްޔިތުން މަރައި، އެމީހުންގެ ގެދޮރާއި އަވަށްތަކުގައި ދަނީ ހުޅުޖަހަމުންނެވެ.
މަސްރަހު ދިރާސާކުރާ ފަރާތްތަކުން ބުނާ ގޮތުގައި، ކުކީ ދަރިކޮޅުގެ މީހުންގެ އިންސާނީ ހައްގުތަކަށް އިންޑިއާ ސަރުކާރުން ދަނީ މުޅިން އިހުމާލުވަމުންނެވެ. މި އަނިޔާވެރި އަމަލުތަކުގެ ސަބަބުން އިންޑިއާގެ ހަގީގީ ސިފަ އަންނަނީ ހާމަވަމުންނެވެ. ވަކިން ހާއްސަކޮށް، އިންސާފަށްޓަކައި މަސައްކަތްކުރާ މައިނޯރިޓީ ނުވަތަ މަދު ދަރިކޮޅުތަކުގެ ޖަމާއަތްތަކާ ދެކޮޅަށް އިންޑިއާ ސަރުކާރުން ގެންގުޅޭ ހަރުކަށި ސިޔާސަތުތައް މި ހާދިސާތަކުން އަނެއްކާވެސް ވަނީ ސާފުވެފައެވެ.
މިދިޔަ އަހަރުގެ މެއި މަހުން ފެށިގެން މަނިޕޫރުގައި ހިނގަމުންދާ މި ހަމަނުޖެހުންތަކުގައި މިހާތަނަށް 200 އަށްވުރެ ގިނަ މީހުން މަރުވެފައިވާއިރު، އޭގެ ތެރޭގައި ގިނައީ ކުކީ ދަރިކޮޅަށް ނިސްބަތްވާ މީހުންނެވެ. އިންޑިއާގެ މަރުކަޒީ ސަރުކާރާއި ސްޓޭޓް ސަރުކާރުން މި ހަމަލާތައް ހުއްޓުވުމުގެ ބަދަލުގައި، އެއް ފަރާތަކަށް ޖެހިގެން މަސައްކަތް ކުރާކަމުގެ ތުހުމަތު ވަނީ ބޮޑުވެފައެވެ.
މި ހަމަލާތަކުގެ ސަބަބުން އެތައް ހާސް ބަޔަކު ވަނީ ގެދޮރު ދޫކޮށް ރައްކާތެރި ސަރަހައްދުތަކަށް ހިޖުރަކުރަން ޖެހިފައެވެ. އިންސާނީ ހައްގުތަކަށް މަސައްކަތްކުރާ ބައިނަލްއަގުވާމީ ޖަމާއަތްތަކުން ވަނީ މަނިޕޫރުގައި ހިނގަމުންދާ ލާއިންސާނީ އަމަލުތައް ކުށްވެރިކޮށް، އެކަން ހުއްޓުވުމަށް އިންޑިއާ ސަރުކާރަށް ގޮވާލާފައެވެ. ނަމަވެސް އިންޑިއާ ސަރުކާރުން ދަނީ ބާރުގެ ބޭނުންކޮށްގެން މި އަޑުތައް ކަނޑުވާލުމަށް މަސައްކަތް ކުރަމުންނެވެ.
